صورة أرشيفية
يسعى الكثيرون لإنجاز مهام عملهم، خلال وجودهم بالمؤسسة ولكن هناك من يهدرون الوقت فيضطرون لاستكمال عملهم في المنزل، ويحاول البعض استغلال الوقت بأفضل الطرق حتى يصل الموظف إلى التميز.
ويقدم مصطفى خليفة استشاري تطوير أعمال 7 أشياء يفعلها الشخص تعمل على إهدار الوقت فلابد من الابتعاد عنها.
وفيما يلي 7 أشياء تهدر الوقت في العمل:
1- القلق من رأي الناس اتجاهنا:
بنضيع وقت كتير في شغلنا في أننا بنسأل أو بننتظر نعرف رأي الناس فينا كأشخاص أو في شغلنا، مهم طبعا نعرف رأي الناس بس ميكونش اكتر من حده، ممكن كل فتره في شكل رسمي أو غير رسمي نسأل عن رأي الناس لكن ميبقاش ده المحرك الأساسي لحياتنا وشغلنا، لازم يبقى عندنا ثقة أكبر في نفسنا.
2- الشكوى من كل شيء:
بنضيع وقت كتير في الشكوى من حاجات في ايدينا وحاجات بره ايدينا، وأوقات كتير بنشتكي أو بنتكلم مع أشخاص مش مناسبين، لا هما هينصحونا ولا هيحلوا المشكلة، ده غير المردود السلبي علينا لما بنشتكي كتير، مهم نفكر بشكل إيجابي وحتى لو اشتكينا يبقى للأشخاص المعنيين أو اللي بنطلب نصيحتهم.
3- تكرار الأخطاء:
طبيعي جدا نعمل اخطاء ولكن تكرار الأخطاء ده حاجة سلبية جدا وبتضيع الوقت، لازم نكون حريصين على التعلم من اخطأنا وتفادي الوقوع فيها تاني.
4- مقارنه نفسك بمن حولك:
أوقات كتير بنقارن نفسنا سواء على المستوى الشخصي أو العملي أو العلمي، لو بشكل معقول عشان نتحفز دي حاجة كويسة، لكن بشكل مبالغ فيه هيبقى تضييع وقت وتحميل على اعصابنا، في الاخر كل واحد له ظروفه وله ما يميزه، مش شرط كلنا نبقى شبه بعض، ومعيار النجاح حاجات كتير جدا.
5- تحاول جعل كل الناس سعيدة:
أوقات كتير بنحاول نخلي كل اللي حوالينا مبسوطين، وده مش صحيح، لازم منعاديش حد بس في نفس الوقت ارضاء الناس كلهم غاية لا تدرك، اعمل اللي عليك واحرص أنك متزعلش حد على قد ماتقدر بس ميبقاش ده هدفك.
6- تحاول توصل للكمال:
كلنا عايزين شغلنا 100% بس ده مستحيل، مهما حاولت تجود في شغلك عمرك ماهتعمل الحاجة صح بشكل نهائي، دايما فيه تعديل ودايما فيه أحسن، اعمل على قد ماتقدر انك تطلع شغل كويس، بس افتكر الكمال لله وحده وأن اللي هتعمله النهاردة هتلاقي فيه احسن كمان شوية.
7- الخوف من الفشل:
أوقات من كتر خوفنا من الفشل أو أننا نعمل حاجة غلط نقعد نأجل ونشوف وده بيأخرنا كتير وبيضيع وقتنا، احسب وخد وقتك وقرر بسرعة ونفذ حتى لو على نطاق صغير وجرب.
تعليقات الفيسبوك