محمد وسٌمية
يقف أمامها، يركع على قدميه، يخرج علبة من سرواله، ثم يقدمه إليها لعرض الزواج عليها، وبشكل خارج عن المألوف لم يكن ذلك "خاتم"، إلا أنها "علبة سجاير".
فكرة غير مألوفة خطرت ببال محمد أشرف، ليس لطلب الزواج من سٌمية، إلا أنه مجرد مشهد تمثيلي يعبر عن حال الشباب هذه الآونة من وجهة نظره، قائلا لـ"الوطن": والله هي مجرد حاجة كوميدية برمي فيها على فكرة أن الجواز بقى من المستحيلات دلوقتي فا نشوف بقى أي نشاط تاني نعمله.. تعالوا نشرب سجاير أسهل بكتير".
ويجد محمد، البالغ من العمر 26 عامًا، أن ظروفه لا تسمح للزواج، وأيضا الحالة العامة لمن حوله، ما جعله يفكر في التقاط صور طلب الزواج بعلبة سجائر، بدلًا من الخاتم، واستبدال جملة "just engaged" بـ"just smoking"، وأوضح الشاب العشريني، أنه غير مرتبط بسٌمية، وأنها مجرد صديقة له و"موديل".
"أكيد مش بدعوا الناس تشرب سجاير وحاجات مضرة، عشان الناس كده كده بتشربها".. وصف محمد خريج كلية تجارة، الذي يرى أنه لم يقصد بذلك التشجيع على التدخين: "ضررها مش هيبقى أكثر من إن أسافر وأتغرب سنين، عشان أحوش ثمن شقة أتزوج فيها، دي بتضيع من العمر".
والتقط محمد الذي يعمل كـ stand-up comedian أو "كوميدي على الواقف"، هو وسٌمية الصور في منطقة وسط البلد: "احنا الصراحة مابيهمناش وجهة نظر الناس لأن لو ركزنا مع كلام الناس مش هانعرف نهزر".
وردًا على كون سٌمية، أدت دور فتاة تقبل السجائر وتدخنها، قال محمد: "الناس اللي هتنتقدها 90% منهم بيشربوا سجاير"، فيما وجد أن ردود أفعال 95% من مستخدمي مواقع التواصل الاجتماعي، عندما نشر الصور كانت إيجابية: "الناس متقبلة ده وبتضحك وفي بنات كتير كتبت Relationship Goals وفي اللي سألوا عليا".
واستكمل محمد حديثه، عن ردود الأفعال قائلا: "في بنات كانت بتمنشن الولاد اللي مرتبطين بيهم وتكتبلهم "شايف" حسيت إن في كتير عايز يعيش براحته، بس خايفين، ومش عارفين عشان هما بنات".
ويرى محمد صعوبة في عمله كـ stand-up comedian، لأنها لم تحصل على حقها في مصر: "المفروض في أي مكان بالعالم المكان الطبيعي للكوميديين اللي مثلي بيكون في وكالات الإعلانات والبرامج التلفزيونية والأفلام".
تعليقات الفيسبوك