نحاتة تمثال "صلاح" بمنتدى الشباب ترد على المنتقدين: "كنت بشرح عليه"
مي عبد الله بجوار تمثال صلاح
تعرضت مي محمد المعروفة بـ"نحاتة المشاهير" لانتقادات عديدة بعد عرض تمثال محمد صلاح الذي صممته في منتدى شباب العالم، ودافعت "مي" عن نفسها قائلة: "مكنش غرضي أعمل تصميم جامد ولا فكرة خرافية كان قصدي أساعد الناس اللي بتسألني وتابعوا الخطوات معايا وعرفو إزاي يبدأوا لوحديهم وده كان مجرد مثال بشرح عليه".
وأضافت "مي" لـ"الوطن" أنها حينما بدأت في صناعة التمثال لم يكن الهدف من ذلك تقديمه في المعرض أو منتدى الشباب وكانت تشرح الخطوات والمراحل على الفيس لتعليم غير المختصصين الذين يملكون الموهبة ويرغبون في التعلم من خلال تعريفهم بخطوات بسيطة تمهد لهم طريق البداية.
وتابعت النحاتة: "كنت مضغوطة في شغل المعرض بس حتى لو شخص واحد استفاد كنت بفرح... في ناس كتير زعلت مني وقالتلي متكمليش خطوات ودي أسرار شغل زي ما سموها، لكني أصريت وكملت عشان يمكن أفيد حتى شخص واحد".
أوضحت نحاتة المنيا، أنها حينما قررت أن تستكمل التمثال لتقديمه للمنتدى وصلت لمرحلة الجبس ذات اللون الأبيض وكانت مقتعنة به جدا لكن القائمين على المنتدى قرروا أن يكون من البرونز فاضطررت للجوء لأحد يصبه من البرونز، واستغرق ذلك وقتًا كبيرا ومجهود لأنه يتم تحويل التمثال من خامة الجبس لخامة النحاس، ثم تفاجأت في آخر يوم قبل تسليم التمثال للمنتدى أنه خرج بالشكل الذي ظهر في المنتدى، ولم يكن باستطاعتها عدم تسليمه، أو تخبرهم بأنها لم تصنع الشغل، مضيفة "لو معرضي الخاص مكنتش عرضته غير وأنا راضيه عنه".
وقالت مي: "المهم إنه طلع في النهاية النتيجة دي، أنا مش مدايقة ولا زعلانة ولا ندمانة لأني عملت اللي عليا وأكتر وربنا عالم بتعبي فوق ما أي حد يتخيل، وما دام أنا عملت اللي عليا ومقصرتش فدي إرادة ربنا إن التمثال باظ في الآخر، والتعليقات السلبية مش هتحبطني ولا هتأثر فيا بس يا ريت الناس تتعلم فن النقد بأدب واحترام لأن مش أي حد يستحمل نقد زي دا أنا الحمد لله قوية، ولو مش قوية مكنتش عملت مشروع التخرج اللي مصر كلها اتكلمت عليه ولا كنت كملت لكن أنا هكمل وهفاجأكم في مشروعي القادم الللي التمثال ده بالنسباله ولا حاجة"، مشيرة إلى أنها ستصنع 22 ثمثالا في معرضها القادم.