أصحاب البازارات فى شرم الشيخ ينتظرون مكاسب ما بعد «منتدى شباب العالم»: «يا رب افرجها.. يا رب شوبنج»
منتدى شباب العالم ينعش مبيعات البازارات بعد فترة ركود طويلة
انتهت فعاليات منتدى الشباب، وبدأت آمال أهالى شرم الشيخ وتطلعاتهم تتصاعد فى تحقيق مكاسب مباشرة بجولات الوفود المشاركة فى المدينة وتسوقهم، وغير المباشرة بعودة السياحة للمدينة، واستقرار أوضاع العاملين فى هذا القطاع، بعد الخسائر التى تكبّدوها خلال السنوات الماضية.
«بعد أى مؤتمر أو حدث مهم فى شرم الشيخ بيمد المشاركين فيه إجازاتهم يوم أو يومين، وبيتسوقوا فى المدينة ويشتروا هدايا»، يقولها عادل رمضان، صاحب بازار سياحى فى السوق القديم بالمدينة، الذى انتظر انتهاء فعاليات المنتدى لتحقيق بعض المكاسب المادية، وفى الوقت نفسه ينتظر المكسب الأشمل، على حد وصفه، بعودة السياحة للمدينة التى يقطنها منذ 20 عاماً: «التوتر اللى بيحصل فى شمال سيناء بيؤثر علينا فى جنوبها، السايح بيخاف ييجى، وبنستنى أى حدث مهم فى شرم الشيخ علشان ترجع ثقته».
«عادل»: ما بنصدق أى مؤتمر أو منتدى عشان ينشط المبيعات
ياسر الطيب، يعمل منذ سنوات طويلة فى أحد بازارات Soho Square، المنطقة الشهيرة فى شرم الشيخ، وتظفر بعدد من الأنشطة التجارية السياحية، التى عانت فى السنوات الأخيرة من تراجع حركة السياحة، تحديداً منذ سقوط الطائرة الروسية: «عندنا أمل فى شباب العالم ينعشوا المدينة، ويزورا البازارات والأسواق قبل ما يرجعوا بلادهم».
اكتسب «ياسر» خبرة كبيرة فى العمل بالسياحة، وتنقل بين المحافظات، على أمل تحسين ظروفه المادية: «20 سنة فى شرم الشيخ، واشتغلت فى الأقصر وأسوان والأحوال نفسها، أول ما الروس يرجعوا، السياحة هترجع بقوة، ولحد ما يحصل ده بنستنى المؤتمرات والأحداث المهمة علشان الأحوال تتحسّن ونبيع ونكسب».
تنظيم أكثر من مؤتمر وحدث دولى فى شرم الشيخ خلال العام الواحد بمقدوره أن ينعش حركة السياحة والعاملين بها، وفقاً لـ«سان مارك»، صاحب مجموعة بازارات فى السوق القديم وخليج نعمة: «أنا فى المدينة من 24 سنة، وفاكر فى 2003 و2004 كانت شرم الشيخ بتستضيف نحو 10 مؤتمرات فى السنة، والسائح بيبحث عن اسم شرم الشيخ وبيروج لها».
«الطيب»: عندنا أمل إن الوفود المشاركة تقعد يومين بعد المنتدى والحال يشتغل شوية
مردود منتدى الشباب على أصحاب البازارات فى شرم الشيخ ليس مباشراً، فى رأى «سان»: «كتير من الوفود هتسافر النهارده ومفيش وقت طويل للتسوق، ورغم كده سعداء بالمنتدى وبنطالب بالمزيد، وتكون خاصة بالسياحة وبشرم الشيخ تحديداً، اللى سبق واختارتها منظمة اليونيسكو ضمن أفضل خمس مدن سلام على مستوى العالم من بين 400 مدينة عالمية».