عادت القطارات.. وبقيت "الطوارئ والاستعلامات" خارج نطاق الخدمة

وقع الخبر في نفسه موقع السرور، أخيرا سيرتاح من عناء "الميكروباصات"، ويعود إلى بلدته الجنوبية عبر القطار. في البداية ساورته الشكوك، حاول أن يتخلص منها بالاتصال تليفونيا بطوارئ السكة الحديد، فأضحت شكوكه يقينا، حين لم يأته الرد تليفونيا، معتقدا أن عودة القطارات جزئية او لعدد من الخطوط دون غيرها، قبل أن تأتيه الحقيقة "القطار رجع بس طوارئ السكة الحديد هي اللي خارج نطاق الخدمة". خارج الخدمة شملت معها أيضا تليفونات استعلامات السكة الحديد، بل أن كل الأرقام التي كان بوسعه الاتصال بها لحجز تذكرة أو تأكيد معلومة عودة القطارات باتت في حيز النسيان، حيث توقفت مع إيقاف الحركة ولم تعد للعمل رغم عودتها. حين فشلت محاولات "رائد عويس" معرفة مواعيد القطارات المتجهة من سوهاج إلى القاهرة، قرر أن يزور المحطة إجباريا.. "البيت بعيد عن المحطة قلت اتصل عشان مروحش مشوار وملقاش قطر أو حجز، بس في الآخر دبيت المشوار". الشاب الصعيدي يستنكر وجود تلك الأرقام وهي معطلة "اللي عايز يعرف حاجة يكلم مين يعني"، الصورة السيئة عن خدمة السكة الحديد زادت لدى عويس، بعد اكتشاف توقف خدماتهم التليفونية "لما رجعوا القطارات قالوا اللي يلاقي حاجة مش طبيعية يبلغ طب ازاي وتليفوناتهم مش شغالة أصلا". توقف خدمة طوارئ واستعلامات السكة الحديد يبررها المهندس حسين زكريا- رئيس هيئة السكك الحديدية - بالانشغال في تأسيس "كول سنتر" جديد، موضحا "الأعطال كتير وبقينا محتاجين خدمة تليفونية كويسة، وفي أقل من شهر هيكون فيه كول سنتر شامل كل الخدمات". "زكريا" يؤكد انفراد الخدمة التليفونية بإدارة خاصة ومبنى كبير جاري تجهيزه "بنختار رقم قصير أرضي ومحمول، وهيكون متوصل بالحجوزات والشرطة والتشغيل، عشان يبقى شامل كل حاجة".