عن إنك طول عمرك بتعمل حاجات مش شبهك

في حصة الرسم كانوا بيحددولك الموضوع، ارسم عن حرب أكتوبر المجيدة.. يعني مكان متعرفوش ووشوش مشوفتهاش، ودم ودبابات، فين الجمال في كده. اكتب موضوع تعبير عن الهجرة النبوية.. أضرار التدخين، أهمية الحدائق العامة.. أقعد ارغي صفحة ونص عن أهمية الحدائق العامة ليه، ثم فين دي أصلا. لازم تذاكر و تحفظ عشان تجيب مجموع، وعمرك ما بتجيب مجموع، أصلا سنتين من عمرك ضاعت عشان بتحاول تتنيل تجيب مجموع، وأي متعة فيها إحساس بالذنب؟، لأنك كطالب وظيفتك في الحياة تجيب مجموع، حتى النشاط، مدارس الحكومة نشاط البنات كان بالطابور، أول 10 هيقفوا هنا هيبقوا موسيقى، أنا في حياتي كلها أخدت حصة موسيقي واحدة، اتعلمت فيها أزاي أرسم مفتاح صول.. بس. وتدخل كليه مرمي فيها بالمجموع، حتى اللي بتدرسه جوا لازم يبقى بالمجموع، والمجموع بحتت ملزمة بـ 20 جنيه آخر الترم. مبدع؟ بتفهم؟ عندك موهبه؟ بتحب اللي ذاكرته؟ عمر ما حد بيسألك الأسئلة دي وهو بيديك مجموعك، عمر ما حد بيقولك حابب تتعلم عن المجال ده ولا استفدت إيه من المحاضره دي، أو حد قالك إيه العبقرية في القاعدة قدام الكتاب بالـ 12 ساعة. وتتخرج ... وترمي ده كله ورا ضهرك وتشتغل مع أول قريب يجبلك واسطة، وهناك يحفظوك إزاي تقيد كذا في دفتر كذا، وبرضه مبيسألوش عن المجموع.