"اعرف نفسك".. بخيل ولا مسرف
ناس كتير بنتعامل معاها بيكونوا بخلاء جدا وبنقول عليهم "جلدة"، وفيه ناس تانية بنضحك عليهم عشان مسرفين، يا ترى بقى انت مين فيهم؟
جاوب على الأسئلة دي عشان تعرف
1- الأفضل بالنسبة لك:
أ- تصرف من غير حساب.
ب- توفر وتحوش عشان بكره.
ج- تجيب هدايا لأصحابك عشان تسعدهم.
د- يجيلك هدايا كتير وتقبلها.
2- لما تيجي تساعد إنسان:
أ- بتبقى مستني إنه يرد المعروف ده.
ب- ممكن تطلب فلوس قصاد مساعدتك ليه.
ج- بتحس إنك مبسوط جدا ومش محتاج أي حاجة منه.
د- بتضطر تساعده عشان منظرك قدام الناس ميبقاش وحش.
3- لو خرجت مع صحابك تاكلوا في مكان:
أ- بتهرب من دفع الحساب.
ب- بتصمم تدفع الحساب لكل الشلة.
ج-هتخلي كل واحد يدفع حسابه لوحده.
د- مش هتروح معاهم عشان بتحب تاكل لوحدك.
4- لما هدومك بتقدم عليك:
أ- بترميها.
ب- بتشيلها في صناديق يمكن تحتاجها تاني.
ج- بتوديها جمعيات خيرية.
د- تبيعها عشان تكسب منها أي قرشين.
5- لما بتشتري هدوم جديدة:
أ- بتكون فرحان جدا بيها.
ب- مبتعملش كده إلا لو محتاج هدوم فعلا.
ج- بتركز قوي على شكلها وماركتها.
د- بتختار الهدوم تنفع لأي مناسبة مش في خروجات معينة بس.
6- لو انت محوش فلوس دلوقتي تفتكر هم كام:
أ- 5000 جنيه.
ب- 1000 جنيه.
ج- 500 جنيه.
د- مش فاكر عشان بتحوش من زمان قوي.
7- لو عايز تشتري آي باد جديد:
أ- هتجيبه مهما كان تمنه لمجرد إنك عايز كده.
ب- هتلف في أكتر من مكان وتقارن بينهم.
ج- هتفاصل في ثمنه قبل ما تشتريه.
د- هتسأل الأول صحابك عن النوع الكويس عشان تشتريه.
8- لما تكون محتاج تشتري حاجة ومفيش فلوس معاك:
أ- تستنى لما تحوش تمنها واحدة واحدة.
ب- تستلف من واحد صاحبك أو تاخد قرض من البنك.
ج- تزنق نفسك عشان تحوش تمنها بسرعة.
د- تكبر دماغك طالما مش معاك فلوس.
9- لو صاحبك طلب منك فلوس سلف:
أ- تقول له مش معايا فلوس.
ب- تديله أقل من اللي هو طلبه.
ج- تخليه يكتب لك وصل أمانة.
د- تسلفه بس تطلب منه هدية قصاد السلفة دي.
التقييم.. خليك أمين مع نفسك وحط درجاتك بصدق.
حط لنفسك 3 درجات لو كانت إجاباتك بالشكل ده: (أ = ب)، (2 + د)، (3 = د)، (4 = د)، (5 = ج)، (6 = أ)، (7 = ج)، (8 = ج)، (9 = د).
وحط لنفسك درجتين لو كانت إجاباتك: (1 = د)، (2 = ب)، (3 = أ)، (4 = ب)، (5 = ب)، (6 = ب)، (7 = ب)، (8 = د)، (9 = ج).
ودرجة واحدة بس لو كانت إجاباتك: (1 = ج)، (2 = أ)، (3 = ج)، (4 = ج)، (5 = د)، (6 = ج)، (7 = د)، (8 = أ)، (9 = أ).
وحتكون نتيجتك صفر لو جاوبت بالشكل ده: (1 = أ)، (2 = ب)، (3 = ب)، (4 = أ)، (5 = أ)، (6 = د)، (7 = أ)، (8= ب)، (9 = ب).
النتيجة.. جهز نفسك عشان تواجه نفسك بحقيقتك.
لو كانت درجاتك أكتر من 15 يبقى خلي بالك يا معلم، انت بخيل جلدة ولازم تغير من نفسك.
أما لو كانت درجاتك بين 10 و5 درجات يبقى انت في الأمان يا صديقي، انت كده كريم وكل صحابك بيحبوك.. اثبت على كده واوعى تغير من نفسك.
لو درجاتك بقى يا حلو أقل من 5.. يبقى انت مسرف وإيدك سايبة، وممكن تورط نفسك في مشاكل كتير بسبب العادة دي، خلي بالك من فلوسك واصرف بعقل عشان ما تتزنقش وترجع تندم.