بالفيديو| قصيدة "قصة كل من على الأرض"

حكاية من السِّيَر حصلت ف كون مافهوش مكان وزمان وقصة كـل من ع الأرض مذكور ف الكتاب إنسان بلاطة فـ صحرا رملية.. وكل الناس سواسيَّة ف بشرة رجلهم لسعة ف أول يوم بيتقابلوا.. بيتفقوا.. ويتقبلوا تساعهم أرضها الواسعة يندّوا الرملة بالمية فتستهدا وتستحيا ويتبادلوا الوقوف راحة ولما حد كان يتعب مايستكبرش يتصعّب تشيله كفوف على الراحة وكان حرقة سمار الجسم.. بتغيّر ف معنى الإسم تتسمّى بجمال ضحكة وترسم بالقشف ع الجلد فقر وجوع بيجلد جلد جسم بيفقد الحركة وزاد الحر على غفلة.. كإن الرقص ده ف حفلة ونار بتقيد لهم م الأرض حفا الرجلين بدأ يسرق عيون محروقة تتجرّأ تنازع ع البلاط الصهد ماعادش سمار وشوشها جمال مافيش واحد بقى بيتشال.. لا ع الراحة ولا ع الكتف وقوس الجسم مـن ضعفه.. يقرّب وقعته ووصفه بيتحوّل لنعل وخُف ولما الحرب ع الهدمة.. وع الميّة.. وع اللقمة تساوي الحق بالقدرة تسيب النفس أخلاقها.. وتكفر باللي يخلقها فروع مش جاية من شجرة وآخر حاجة تفهمها.. ف نقطة دم أقدامها سليمة ف جسم متقطّع بإن الحرب أسبابها.. بلاطة.. والشيطان جابها وسابها ف كل عين تلمع فكرْهِـت كل حاجة العين.. وحبت بس وقفتها وماتت قبل ما تنولها وكتب الدم فوق الرمل.. حكمة وكل مابتحصل نموت بعد أما بنقولها