عم أحمد.. مات

عم أحمد مات ولا دي إشاعات هري وهرتلة أو أي كلام *** إزاي إن كنت يادوب شفته من كام يوم بس عالشاشه ملعلع بيبدَع بكلام يتحس وأنا قلبي معاه كان يتنطط ويعيش أحلام *** كان عايش علشان يتنفس حب وحريه وأشعار لا يخاف ولايسكت ويبسبس أو حتي يخاف م الجوع والنار وياكلها بدقة عشان الحق لو حتى.. هايجوع أيام *** يا ما خد من عمره السجن راقات واتاريه هوه اللي بيديه بمزاج يدخل علشان مش راح يسكت وينادوا عليه: إفراج يتريق ويقول طظ يا "تيت" يا غجر يا لئام *** اتريق علي طوب الأرض وشتمهم بالطول والعرض إنما في الآخر من جواه متشوفش أبيض من قلبه حد بيعيش مصري ويقول مصري دي بتاعتي ومش اسيبها لحد ويشيب الشعر اللي في وشه والقلب شباب للثورة إمام *** مات اللي مخافش من الحكام ورزعهم ياما كلام ألغام سجنوه لسنين عداها هوا كأنها تعويرة أو حتى زكام أشعاره هتعيش جوانا وإن سابنا ومات هنقوله سلام