داخل أي مقابلة عمل، توجد أسئلة واضحة وهدفها صريح، وعلى جانب آخر هناك أسئلة تهدف لمعرفة شخصيتك وطريقة تفكيرك حتى يمكن من خلالها اتخاذ قرار قبولك بالعمل أم لا.
ويقدم مصطفى خليفة استشاري تطوير الأعمال، بعض الأسئلة التي من الممكن أن "توقعك" احذر منها، وذكر بعضها:
1. "إيه اللي خلاك تدور على شغل، أو إيه اللي يخليك تسيب شغلك؟"
- "السؤال ده على قد ما هدفه شغلك القديم على قد ما بيوضح ممكن تسيب الشغل الجديد امتى، هو عايز يعرف إيه اللي يخليك تسيبنا، هنا لازم تكون إجابتك ذكية، زي أنك مبقتش تطور في شغلك أو محتاج تحدي جديد، وممكن تكمل أن طول ما فيه تقدير من الشغل ومسار وظيفي كويس هفضل مكمل وبأدي بشكل كويس، وده عشان تعرفه أنت منتظر إيه منهم في شغلك الجديد".
2. ليه عايز تشتغل في شركتنا؟
- "هنا لازم تكون مذاكر الشركة اللي أنت رايحها كويس، زي مثلا طبيعة عملها وبتشتغل في مجالات معينة أو أنها شركة كبيرة، لازم تقول مميزات حقيقية وتكون مختلفة عن شركتك القديمة".
3. كلمنا عنك؟
- يعتبر من أخطر الأسئلة، لأنه بيبين إيه المهم بالنسبة لك فهتبتدي بيه أو تذكره، كان فيه سؤال بيتعمل في جلسات التدريب، اتكلم عن نفسك 10 دقايق من غير ما تذكر تعليمك أو خبرتك السابقة في الشركات أو هواياتك، على قد السؤال ده ما يبان سهل على قد ما هو صعب جدا، حاول كده مش هتلاقي حاجه تقولها.
- هنا المطلوب تتكلم عن شخصيتك، أسلوب عملك في الفريق أسلوب إدارتك كمدير، المهارات اللي اأنت شاطر فيها والمهارات اللي أنت شايف أنها ممكن تتحسن أو محتاج تشتغل عليها، طبعا بعدها اتكلم عن تعليمك وأنك متخرج منين ولو خدت شهادات تانية، وعن خبراتك السابقة في الشركات والمهام بتاعتك في كل شركة بس ده بعد ما تتكلم عن شخصيتك.
4. إيه نقاط قوتك أو ضعفك؟
- "زي ما اتفقنا إحنا هنا بنتكلم عن شخصيتك، فاتكلم عن نقاط قوتك بموضوعية وحاول تحكي مواقف تأكد كلامك، واتكلم عن نقاط ضعفك وإزاي أنت شغال عليها عشان تتحسن، مفيش حاجة اسمها معندكش نقاط قوة أو نقاط ضعف، كلنا عندنا الاتنين، الأهم نبقى عارفين نقاط قوتنا اللي بتدينا ميزة ونقاط ضعفنا عشان نحسنها".
5. عايز تحقق إيه بعد 5 سنين؟
- "طبعا ده من الأسئلة الأكثر شيوعا، بس برده له هدف، لو قلت منصب معين ممكن يجي بعد 10 سنين يبقى أنت مش فاهم التسلسل الوظيفي وهتتعبهم في الشغل أنك هتبقى عايز تترقى وخلاص، ولو قلت منصب ممكن تاخده بعد سنتين أو تلاتة يبقى معندكش طموح، هنا ممكن تسأل لو مش عارف إيه الفترة الزمنية بين كل مستوى والتاني وتختار منصب ممكن يتحقق بعد 6 سنين مثلا، فتبين أن عندك طموح بس فاهم طبيعة الشركات والمسارات الوظيفية".
- "طبعا مهم قبل ما تتكلم عن المنصب أنك تتكلم عن تحقيق نجاح في الشغل وتحقق أهداف الشركة من خلال وظيفتك، وأنك كمان تتعلم حاجات جديدة وتطور من مهارات، لأن رؤيتك لنفسك مش بس منصب وفلوس، كمان تحقيق أهدافك الشخصية وأهداف الشركة".
تعليقات الفيسبوك