يعني إيه كلمة "يعني إيه"؟
يعني إيه كلمة "يعني إيه"؟
عمرك سألت نفسك يعني إيه كلمة "يعني إيه"؟! هل هو مجرد سؤال استفهامي، ولا كمان ساعات بيبقى سؤال استفزازي، وفي بعض الأحيان بيبقى سؤال فضولي حشري ولا وسيلة للاعتراض والشجب والرفض، ولا يمكن بيكون ساعات زي المنبه اللي بيصحي عقلك واللمبة اللي بتنور طريقك فيرشدك لنتايج كتير ممكن توصلها بنفسك من غير مساعدة من أي حد.
اللي أنا متأكدة منه سواء كان استفزازيا أو فضوليا أو حشريا أو استنتاجيا أو غيرها من المشاعر الإنسانية الملعبكة، فهو أكيد منكاش بينكش ويجر شكل كل حاجة مش مفهومة، أرجع كده بالذاكرة لورا وإحنا لسه عيونا بتفتح على الدنيا ومع أول حروف اتجمعت على لسانا كنا بنسأل عن كل حاجة حوالينا وبنتعرف على عالمنا الجديد اللي بيتشكل في أذهانا عن طريق السؤال ده "يعني إيه"، ولو إني مش فاكرة المرحلة دي من حياتي، ومش فاكرة إذا كنت عديت عليها أصلا ولا لأ، إلا إني متأكدة إني سألت نفسي كتير السؤال ده على فترات ومراحل متباينة من عمري، وإن نفسي بس هي اللي كانت بتحاورني وتجاوبني، وإن نفسي ياما استفهمتني، وياما استفزتني، وياما خنقتني بفضولي وحشريتي لكنها كمان ياما استنتجت حاجات كتيرة من حواليا.. ومهما اختلفت النتايج واتعددت واتغيرت إلا إن النتيجة والحقيقة الوحيدة الثابتة اللي دايما كنت باخرج بيها إنك متستهترش أبدا بـ"يعني إيه" ومتكسلش إنك تطرح السؤال على عقلك وقلبك وكل جوارحك لأنه ممكن يبقى له الفضل عليك في اكتشاف حقايق كتير كانت عنيك متغمية عنها.
ممكن يبقى سبب في تغيير طريق هتمشيه أو تغيير اختياراتك في حياتك. ممكن يبقى سبب في إنك تسيب ناس وتقرر تعرف ناس جداد. ممكن يبقى سبب في إنك تتعرف على نفسك من أول تفرمتها (تعمل format) تدلت (تعمل delete) منها الوحش وتسيف (تعمل save) كل حاجة حلوة جواك.
وعشان كده أوعى تبطل تسأل السؤال ده. أوعى تقتل التفكير والحوار اللي بيدور جواك واللي يرجع الفضل فيه لسؤال "يعني إيه؟!".
اسأل دايما "يعني إيه" ومتخافش أبدا من الإجابة مهما كانت النتيجة، بجد السؤال هيكون الطريق لترجمة كتير طلاسم مش مفهومة في حياتك وجايز كمان يخلي حياتك أحلى بس مش دايما مأقدرش أوعدك، لأن مش كل حقيقة بنحب نشوفها أو بتيجي على مزاجنا بس أكيد مهما كانت مش حلوة فهي أحسن بكتير من مرارة الغفلة أو الكدبة اللي بنعيشها وبنعيش فيها، فأحسن ما تعيش جاهل غافل أو مخدوع.. فتح مخك فتح عينك وافتح بقك وقول بالفم المليان وبكل ثقة من غير خوف "يعني إيه...؟!".
