عبيد عن فترة رئاسته لـالصيادلة: واجهنا شائعات تهد الكيان النقابي

04:20 م | السبت 15 ديسمبر 2018

وجه الدكتور محيي عبيد نقيب الصيادلة، كلمة لجموع الصيادلة عقب تقديم أوراق ترشحه لانتخابات التجديد النصفي على منصب النقيب، وقال خلال كلمته: "الزميلات والزملاء الأعزاء، بكلمكم النهارده بكل صدق وشفافية عن الأمانة اللي حملتوهاني خلال الـ 4 سنوات اللي فاتت".

وأضاف عبيد، في معرض كلمته: "أنا جيت باختياركم واتحملت المسئولية، وبفضل الله وبفضلكم، حققنا حاجات كتير، اشتغلنا بجد وأمانة وما يزال أمامنا الكثير عشان نحققه، بدأنا في تنفيذ عدد من أحلامنا المؤجلة، اللي كانت بعيدة أوي إننا نحققها، وقائمة الإنجازات المحققة تكفي أي نقيب لكي يفخر بما حققه في الـ 4 سنوات الماضية، من توصيف وهامش ربح وتكليف صيادلة ونوادي وزيادة المعاش، حاجات تليق بصيادلة مصر ونسيبها اللي جاي بعدنا".

وتابع: "واجهنا شائعات كتيرة كانت كفيلة أنها تهدم الكيان النقابي بالكامل، ولكن بفضل الله وفضلكم، قدرنا نتصدى لها، بالعمل الجاد والمتواصل، لما رشحت نفسي من 4 سنين كنت داخل معنديش فكرة عن كل حاجة، لكن هل كان عندنا تحديات، أيوه كان طبيعي عندنا تحديات ومشاكل، لكن بذلنا كل جهدنا عشان نحل هذه المشاكل وربنا شاهد علينا، مين كان يحلم أن يكون عندنا صيدلي، مدير أو رئيس هيئة تأمين أو يكون عندنا تخصصات أخصائي واستشاري".

ولفت إلى أنه "أنا لما جيت أرشح نفسي المرة دي، استخرت ربنا، قررت أن أرشح نفسي مش عشان عايز منصب ولا عايز كرسي، أو أي حاجة تانية، لكن عشان عايز أخدم زملائي وبيتنا النقابي، اللي إحنا منتمين له، ونكمل المشوار ونحافظ على حقوق وكرامة الصيادلة، وعشان نكمل التوصيف الوظيفي والهيئة العليا للدواء، وزيادة المعاش مرة أخرى والاستمرار في الحفاظ على تكليف الزملاء، نحافظ على صيدليات مصر وتكون الصيادلة وليس للدخلاء، وأيضا زيادة هامش الربح، ونكمل اتفاقيتنا مع حماية المستهلك".

واختتم كلمته قائلا: "منتظركم واتمنى أن يكون يوم الانتخابات عُرس ديمقراطي، انزلوا عبروا عن رأيكم واختاروا من يمثلكم، وأكيد طول ما إيدينا في إيد بعض هنحقق كل أحلامنا".