برج الكلب
يعني أيه تبقي بنت ؟!!
أكيد سؤال ملوش إجابة.
لكن المشكلة إننا في مجتمعنا هنلاقيله إجابة وإجابات كتيرة جدًا كمان.. يعني تمشي في الشارع تتعاكسي، يعني يتحرش بيكي، يعني البنت مش زي الولد في مجتمع ذكوري بسبب عادات وتقاليد مش عارف هما جابوها منين، مع إننا لو نظرنا لتاريخنا الفرعوني هنلاقي، إن البنات كان ليهم قدر كبير جدًا من الاحترام والمشاركة في كافة النواحي، أنا ذكرت تاريخنا الفرعوني لأن بدايتنا واصلنا وأجدادنا فراعنة وأفتخر طبعًا، بس المشكلة إن الشباب بيبص للبنات على إنهم جنس تالت، اه والنعمة مع إنك عزيزي الشاب الكائن "البضوحباطي" لو بصيت في بيتك هتلاقي زيها في مامتك، في أختك، في عمتك، في بنت عمك، في بنت خالك، يعني مش كائن ولا جنس تالت غريب عليك، ولا إيه يا أبوالكباتن.
لا واللي يجننك أكتر بعد انتشار ظاهرة التحرش، إن الشباب ابتدوا يتحرشوا بس باحترام اه والله زمبؤلك كده يعني، نلاقي سواقين الـ"توك توك" كاتبين عليه من ورا "عاكسها بس متلمسهاش" لا يا راجل عرفتكش أنا كده، ارجع لأصلك وأفهم إنك إنسان مش مواليد برج "الكلب".