ليه أمشى حافى؟
ليه أمشى حافى؟
ليه أمشى حافى، وأنا منبت مراكيبكم؟
ليه فرشى عريان، وأنا منجّد مراتبكم؟
ليه بيتى خربان، وأنا نجّار دواليبكم؟
هى كده قسمتى؟
الله يحاسبكم!
ساكنين علالى العتب، وأنا اللى بانيها
فارشين مفارش قصب، ناسج حواشيها
قانيين سواقى دهب، وأنا اللى أدور فيها
يا رب ماهوش حسد
لكن بعاتبكم
من الصباح للمسا، والمطرقة فى إيدى
صابر على دى الأسا! حتى نهار عيدى
ابن السبيل انكسى، واسحب هرابيدى
تتعروا من مشيتى
واخجل أخاطبكم
ليه تهدمونى وانا اللى عزكم بانى
أنا اللى فوق جسمكم قطنى وكتانى
عيلتى فى يوم دفنتى ما لقيتش أكفانى
حتى الأسيّة وانا راحل وسايبكم؟
