بريد الوطن| أنا ماشية
صورة أرشيفية
يا ريت تدينى من وقتك
كمان ساعتين
وتفتح لى دولاب أشواقك المقفول
هلملم بس كام ذكرى
واطبطب برضه على بكرة
واقوله سامحنى ماقدرتش
يبات حلمى معاه مقتول
وهاخد برضه كام نظرة
وكام فرحة وكام ضحكة
عشان قلبى يتيم الحزن
يوم صدق
بإن هوانا كان كحكة
فكان لازم يكون عجبة
وشىء أكبر من المعقول
وانا مسامحة
على الحب اللى كان عهدى
ومتعداش يدوب عندك حدود القول
أنا مسامحة
على باب اللقا اللى اترد
على القسوة ف ليل الصد
على الشوك اللى مدارى
ف ملامح ورد
وساب السم جوايا وبات مسلول
خلاصة القول
أنا ماشية
لكن سايبة
على حيط الأمل مسمار
نجلاء نعيم
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com