والد الشهيد يستأجر سيارة لنقل الأهالى

بحماس شديد وهمة عالية، وقف محمود بغدادى والد الشهيد محمد بغدادى، أحد شهداء مذبحة رفح الأولى، وسط أسرته وجيرانه بقرية المحسمة مركز أبوصوير محافظة الإسماعيلية ليحثهم على التصويت بنعم على مشروع الدستور الجديد، لم يكتف الرجل بالمشاركة فى الاستفتاء، لكنه قام بتأجير سيارة نصف نقل على نفقته الخاصة لنقل الناخبين إلى مقار اللجان الانتخابية، بعد استشهاد أولادنا فى رفح ما شفناش غير الخراب والدمار، استهداف الجنود لم يتوقف بل ازداد، وعشان كده كنت دائم الانتقاد لمرسى وما خفتش منه لما كان فى الرئاسة، كان عازمنا على الإفطار فى رمضان السنة اللى فاتت فى قصر الاتحادية، لكنه لم يحضر، بينما حضر الفريق السيسى، لكن مرسى طلب مقابلتى لما لقانى بانتقده وباشتم عليه فى كل حتة، رحت قصر الاتحادية، وقابلته وقلت له: «أنا ما انتخبتكش ولا طلبت مقابلتك ودم أولادنا فى رقبتك، وما طلبتش أقابلك ومش عاوزك، عاوز تعدمنى اعدمنى، عشان أشوف ابنى، ولو عاوز تعتقلنى اعتقلنى، قال لا أتكلم على راحتك، قلت له.. شفت إيدى عاملة إزاى، خشنة قوى، أنا مربى عيالى على كدة، على الحلال، الشهيد محمد كان بيقولى بيتعرض علينا آلاف الدولارات عشان نفوت حاجات، لكننا ما نقدرش عشان بلدنا».