مصطفى: حاربت فى 73.. وزوجته: وأنا نزلت الاستفتاء

أمام لجنتهما الانتخابية فى منطقة أرض اللواء وقف الزوجان العقيد متقاعد مجدى مصطفى وزوجته هناء حسن، يستعيدان ذكريات حرب 73 المجيدة، التى تخللها بعض المزاح والدموع: «فاكرة لما كنت أنا على الجبهة فى 73، كنا بنحارب العدو وربنا نصرنا»، تضحك الزوجة حين تتذكر نفسها فى ذلك التوقيت: «أيوة، ساعتها كنت فى المدرسة فى ستة ابتدائى ونفسى الحرب تطول عشان آخد أجازة أكبر!». ضحكة من القلب انطلقت من الزوجين، أعقبها تعليق من الزوج قائلا: «صحيح إنتى ماشاركتيش على الجبهة وكنتى طفلة، لكن النهاردة بنخوض قتال جديد قدام اللجان، لازم كلنا نشارك فيه عشان حماية البلد من المؤامرات اللى كلنا عارفينها، البلد مستهدفة، والمفروض إن كل وطنى شريف اتولد على الأرض وكل من خيرها وعاش فيها واتنفس هواها ومشى تحت سماها واتعلم على حسابها ينزل يشارك فى الاستفتاء دى أقل حاجة». العقيد الذى اعتبر مشاركته وزوجته نوعا من القتال قلل من حجم دورهما مقارنة بحجم أدوار أخرى: «نيجى إيه فى ضباط الداخلية والجيش اللى ما بيناموش، التصويت ده رفاهية مقارنة بالجهد المبذول عشان يتم على خير، ربنا يعين كل شريف على حماية البلد».