تامر أمين عن توزيع التابلت: "الطالب كان بيروح في إيده حرنكش"
تامر أمين
قال الإعلامي تامر أمين، إنه يجب البناء على بداية توزيع أجهزة التابلت على طلاب الصف الأول الثانوي، مضيفًا: "النهاردة دورنا العربية، وابتدينا الحركة عشان نحقق الهدف".
وأضاف خلال حلقة اليوم، من برنامج "آخر النهار"، المُذاع عبر فضائية "النهار": "كانوا بيقولوا لنا تعليم تراكمي وتعليم نشاط وكلام كبير مفيش حاجة بتحصل منه، وكانوا بيشيلوا سنة سادسة ويحطوا سنة رابعة، وكانت حاجة كنافة بالطرشي ملهاش علاقة بالعلم".
وتابع: "الوضع اتغير والطالب بدل ما كان بيروح وفي إيده ورق وحرنكش، بقى في إيده تابلت، وده نشكر عليه الحكومة، لأن الدولة مكنتش مجبرة على توزيع التابلت على الطلاب، ومفيش حد بيعمل كدة".
وواصل: "الطالب المصري شكله اختلف كثيرًا، وهذا شيء جيد، كما أن المضمون سيختلف، حيث سنستخدم التقنية الحديثة بدلًا من الورق".
وأكمل: "وده معناه إن طالب المدرسة الحكومي هيدرس زي أوروبا، مش زي ما كان الفراعنة بيدرسوا على برديات، لحد يوم 10 في الشهر كنا بندرس على ورق برديات، ومكناش اتقدمنا يوم من وقتها، كانت حاجة في منتهى الخزي، لكن دلوقتي الطالب بقى شكله كأنه شغال في مايكروسوفت".