أسعد اللواء: كل حيوان بيعلمنى حاجة

08:47 م | الأربعاء 13 فبراير 2019

تغيرت حياته بعدما تجاوز عمره الـ65 عاماً، أصبح أكثر اهتماماً بنفسه وبمواهبه، ترك المهن الحرفية التى عمل فيها، والتى أنهكت قواه طوال سنوات طويلة، الحدادة والخراطة والأويما، وقرر أن يحصل على استراحة محارب، ويقضى ما تبقى من عمره فوق سطوح منزله، منشغلاً بتربية الحيوانات والطيور، وهى الهواية التى ظهرت بعد سن التقاعد.

أسعد اللواء، 65 عاماً، نجح فى اكتشاف نفسه، قبل أن يصل إلى الستين، كانت حياته مقتصرة على العمل، العمل من أجل العمل، خاصة أنه لم يرزق بأبناء، وبعد أن وصل إلى منتصف العقد السابع من عمره، استرد روحه وكون صداقات من نوع مختلف مع الحيوانات والطيور التى يربيها: «بربى كلاب وقطط وعصافير وحمام وخيول، قعدتى معاهم بتصفى نفسى وبتخلينى أحس بسعادة كأنى قاعد مع أولادى».

قيم جديدة تعلمها «أسعد» من تربيته للحيوانات والطيور: «بتأمل وبتعلم من كل حيوان حاجة، الحمام أضاف لى قيماً ومبادئ، فيه صفات الحنان والغيرة والجمال، والكلاب اتعلمت منها الوفاء والجرأة، والقطط اتعلمت منها الحب، والخيل اتعلمت منه النبل والأخلاق والفروسية فى التعامل، الخيل عنده أخلاق، لو عدى وفيه قطة أو كلب يقف لحد ما تعدى».

{long_qoute_1}

يحب «أسعد» الجلوس مع شباب منطقته بحارة النصارى: «بعتبرهم زى أولادى، ولأن مفيش اهتمامات مشتركة بين جيلى وجيلهم، بتكلم معاهم عن الحيوانات، بحكى لهم عن حياتى الجديدة اللى اتغيرت لما اكتشفت حبى لتربية الحيوانات والطيور، وبقولهم كل واحد عنده هواية المفروض ينميها، بحاول أشجعهم وأدعمهم على تحقيق أحلامهم»، صنع أسعد «سلاكة حمام»: «رحت للصنايعى قلت له فكرتها وعملها لى، اتصنعت تحت إشرافى، وحاططها جنبى من حبى للطير»، شكله يبدو أصغر من عمره، يهتم بمظهره، شعره طويل ولحيته مهذبة، وابتسامته لا تفارقه، وحركته خفيفة: «بحب أسمع موسيقى وأنا قاعد فوق السطح، بحب أدندن مع الأغانى القديمة، خاصة أغنية المطرب الراحل فريد الأطرش (الحياة حلوة بس نفهمها)، وهى دى النصيحة اللى بقولها للشباب، حبوا الحياة وافهموها صح، اسمعوا موسيقى شوفوا سينما اعملوا الحاجة اللى بتحبوها».

وكما يعشق «أسعد» كل أنواع الحيوانات، يتقبل كل البشر، يحب كل أنواع الفنون: «بحب الفن القديم والجديد، بحب أحمد السقا وكريم عبدالعزيز وأحمد مظهر وعمر الشريف، الموسيقى بالنسبة لى غذاء الروح، بسمع أم كلثوم وحليم ومحمد فؤاد والحجار وكله، وبحب الأبنودى وصلاح جاهين».