م الآخر| لما روحك تتخطف

لما روحك تتخطف تنحدف عنك بعيد لما عينك تلمحه آه بيضحك بس جواه مش سعيد تلقي روحك تحضنه تسكنه.. ف حته أبعد م الوريد تبقي نفسك تلمسه ترقص الدمعة ف عيونك لو تشوفو يوم سعيد أيوه قلبي بيحضنك كل عمري بيشكرك إنك بقيت ويايه فيه كل حلم أنا بحلمه أو خيال أنا برسمه عديت حدوده هربت بيه آه بحسك.. لما موج البحر يضحك لما نور الشمس يطلع ف ابتسامة طفل بتلاعبه الملايكة لما تبقي ف كون بعيد عني غايب مش قريب وأقدر أنحت فوق كفوفي كل لمحه من ملامحك قلبي عارف إنك إنت مش غرام حاجه أقوى من الغرام زي حلم ف المنام وقته كله يبقي لحظة يسكن خيالك ألف عام لمسة خيال زي الندي ودي رسالة من السما رغم البعاد رغم السفر هنكون سوا.. لما نسيب دنيا البشر