الطفل المعجزة: سبّاك وعامل ولاعب ورب أسرة
محمد أحمد، الشهير بـ«كبو»
رغم صغر سنه، فإنه يحاول مساعدة والده فى العمل، مرة بنقل الطوب والأسمنت والرمال إلى مواقع الحفر، وأخرى بالعمل فى السباكة بدرجة «أسطى»، دون أن ينسى مهمته الأساسية بكونه طالباً، أو هوايته وحلمه بأن يصبح لاعب كرة قدم.
محمد أحمد، الشهير بـ«كبو»، 10 سنوات، يلخص حياته بكلمات بسيطة: «بشتغل وبكسب وبصرف على نفسى وبساعد أهلى».
ورغم المشقة يحاول الاستمتاع بكل لحظاته: «أيام بنزل الشغل، وأيام بطلع على مركز الشباب، عشان بدّرب مع فريق كرة قدم».
صاروخ، منشار وعربة لجر الرمال والزلط، هى الأدوات التى يستخدمها «محمد» فى العمل طوال أوقات يومه: «الناس بتستغرب إزاى بمسك الصاروخ، وأقطع المواسير وأنا فى السن ده، ومع الوقت بتزيد خبرتى، وأتعلم أكتر من أبويا، وبفرح لما أشوف الناس مبسوطة بشغلى».
بكلمات حنون يحكى والد «محمد» عن دور ابنه فى حل كثير من الأزمات المادية للأسرة: «فى أوقات الزنقة بلاقيه بيسدّ معايا، مش عارف إزاى بيقدر يحوّش من مصروفه كده»، ويفتخر بنفسه لأنه استطاع أن يزرع داخله معنى المسئولية: «ربيت صح، وعلمته صنعة، وبقى مسئول عن إخوته، أحسن ما يكون عاطل ويقعد على قهوة».