م الآخر| 25 يناير.. ثورة بطعم المؤامرة
في رأيي إن المؤامره بدأت من بدري ومخطط لها من الخارج، يعني كانت مؤامرة مكتملة الأركان، وده بينكشف لنا دلوقتي، وتتوالى الصدمات في بعض رموز 25 يناير، ولكن في جميع الأحوال عندما انضم الشعب لها بكل براءة أصبحت ثورة، ومع مرور الوقت سيدان من اشترك في المؤامرة، ويربح الشعب في الآخر، لأنه هو المستفيد في الآخر، يعني المصلحة صبت في الآخر لصالح هذا الشعب.
السؤال هنا بقى ليه في بعض الأصوات طالعة في المقدر جديد، لتدين وتتوعد أي حد يتكلم في ثورة 25 يناير، واللي حصل فيها؟؟
لييييييه هو إنت لو واحد طبيعي ونزلت في ثورة 25 يناير وكنت تؤمن بأي رمز من الرموز المشبوهة الآن، وظهر على حقيقته، ألم يصيبك أي نوع من أنواع الصدمة أو المرارة، لأنه استخدمك ليحقق المطلوب منه؟؟
هو ممنوع علينا إن إحنا نعبر عن رأينا أو نوصف مشاعرنا ومدى الصدمة اللي اتصدمنا بيها؟؟
ليه في شوية ناس طالعين دلوقتي يتكلموا في الإعلام عن إن الشباب لم يشارك في الاستفتاء على الدستور لهذا السبب؟
دي حاجة تغيظ يا أخي، إنتوا عايزين تكمموا أفواهنا وتخرسونا لييييه؟
طيب عايزة أسأل بعض الشباب دول بعض الأسئلة، يمكن نعرف مين دول.
هل انت اشتركت في ثورة 25 يناير؟ نعم اشتركت، وما هو الدافع وراء اشتراكك؟ لإزاحة النظام الفاسد وللمطالبة بالعدل والحرية وكل الحقوق المغتصبة، وهل وجدتهم بعد حكم الإخوان؟ لأ الحال أصبح أسوء وباعوا البلد للي يدفع أكتر.
ماشي.. يعني انت نزلت وشاركت في كل الانتخابات والاستفتاءات اللي فاتت؟ نعم
طيب ماحسيتش إنه انضحك عليك وأخدت على قفاك منهم ونفسك تصحح الوضع؟ نعم
ألم يصيبك أي شيء من الصدمه لاكتشافك مدى المخططات الخارجية لتفتيت الدولة؟ نعم
السؤال هنا بقى لماذا لم تعط العذر لأي شخص تحدث بأي سوء طال ثورة 25 يناير؟
أليس همك الأساسي هو الدولة؟؟ يعني انت شاركت في كل حاجة واديت رأيك، ووقفت في زورك إن في ناس طالعة في الإعلام بتتكلم عن المؤامرات اللي كانت بتحصل ضد مصر؟ مهمكش مصر؟ ماحستش بالغيرة على بلدك؟
يعني إنت ممكن تبيع القضية الأساسية وهي بلدك، علشان كام كلمة في الإعلام؟؟
يا سلام بقى انت ممكن تبني وطن؟ ده انت بعت الوطن علشان كام كلمة، وإيه المكسب اللي هيعود عليك لو قلنا لك إن ثورة 25 يناير لم يكن يشبها أي شائبة؟؟ أول مرة أعرف إن الاعتراف بتاريخ معين أو عدم الاعتراف بيه يكون زي القمار والرهان في المقابل يكون هو (الدولة).
هذا هو الفرق بين من يضحي بحياته وأمانه من أجل هذا الوطن، حتى لو سبوه ووصفوه بأقذر الشتائم وهددوه بالقتل هو وأبناءه، ومع ذلك ضحى بكل ذلك من أجل هذا الوطن.
فأرجوكم متصدعوناش بأشباه الرجال ونترك الرجال الحقيقين.
فإذا كانت (ثورة 25 يناير) رمز تاريخي وهي أصبحت كذلك بالفعل، فهل من الطبيعي بأن نضحي بحياتنا من أجل رمز تاريخي أم نضحي بحياتنا من أجل الوطن؟؟؟