م الآخر| انفجار مديرية أمن القاهرة.. وابقى قابلني

وحياة النبي بلاش تجيب سيرة الإرهاب الغاشم والقصص دي، عشان مرارتنا ما تتحملش ملل.. جبت إيه من عندك؟ سيب الشجب والخطابة للباشا الوزير، هو بيحب الحاجات دي أوي!، ده غير إنه فاضي بطبيعة الحال. بالذمة اتفاجأت؟ يا راجل ده أي عيل صغير في الأرياف كان عنده فكرة إن مديرية أمن القاهرة مستهدفة، ومع ذلك الميكروباصات بتركن هناك، وبياع الملابس الداخلية الحريمي فارش على رصيف المديرية (وكله بسبعه ونص)، والأكادة إنك لو شاب محترم حاولت تدخل لأي سبب طبيعي، أو حتى تعدي جنب الباب هتسمع سخافات بلا حصر من أفراد الأمن البواسل، نفس المعاملة من العسكري اللي عنده أنيميا اللي حطينه على باب المتحف الإسلامي، ووظيفته الوحيدة إنه يقولك ممنوع تمشي على الرصيف، ويحرس البوية اللي بيجددوها كل شهر لزوم السرقة!. بصراحه درجة عالية من الحس الأمني، المفروض يدرسوها في "الإف بي آي" تسأل نفسك: هما الكبار في الداخلية بيعملوا إيه بالظبط غير إنهم يرموا كام شهيد في عمليات خايبة، ويعيطوا معانا على قناة النيل للأخبار؟ والظباط بيعملوا إيه غير الرزالة على خلق الله الغلابة في الكماين؟ وأي مواد ناسفة بتدخل تحت حمولات الطوب على الدائري عادي جداً!. عايز تسألني طيب يعني إنت شايف إيه؟ هقولك ماشوفش وماليش فيه.. اللي يشوف ويعمل خطط أمنية هما الباهوات مستشارين الباشا وزير الداخلية، والخبراء الأمنيين واللواءات الكبار اللي بيلمعوا في خطبة عدلي منصور، أومال هما بياخدوا ألوف الألوف من الضرايب اللي من مرتبي، مقطوعة من لحمي الحي بمناسبة إيه؟ معونة الشتا مثلا!. ولزومها إيه الفشخرة بعربيات الجيش والأمن المركزي في ميادين التحرير والنهضة وأرض المعارض؟ عملت عقلك بعقل أنصار بيت المقدس، وشوف مين اللي طلع على قد حاله أوي يا خال! طيب أنا أطمن على نفسي إزاي في بيتي، ومديرية الأمن مش عاملة حسابها في عربية نص نقل متعبية مواد متفجرة؟ وإيه الداعي أتصل بالنجدة في حالات الطواريء، والناس ماشيين في مسرح العملية عادي على الجثث والبصمات وبقايا القنبلة، والعساكر اللي بيتكلموا فلاحي طالعين على السي بي سي يتصوروا مع الناس، اللي عاملين هناك احتفال وبيسألوهم هو حصل إيه بالظبط (العساكر اللي بتسأل الناس!). هو الباشا مدير الأمن ما بيشوفش الشريط الأصفر بتاع البحث الجنائي في المسلسلات الأجنبية؟ حد يا جماعة يديله رقم الطواريء اللي المفروض نتصل بيه لو لقينا جسم غريب!.. انسى يا سيدي وروح المعرض اشتريلك مجلة فكاهية تناسب الموقف والظروف، وخللي بالك عشان هتتعامل أسخف معاملة من الأمن على البوابات، وهيمشوا وراك بالبالطو والجرنان المخروم لو اشتريت كتاب مريب، غير تفتيش شنط الآنسات وسؤالهم عن نشاطك السياسي ودراستك واسم أمك.. هو مين اللي كانوا بيقولوا عليه لا منه ولا كفاية شره؟!.