النحو فى «كبسولات لغوية».. لازم تفهم
النحو فى «كبسولات لغوية».. لازم تفهم
تدنِّى مستوى اللغة العربية بين الشباب، واعتمادهم على لغة «الفرانكو» فى الكتابة، أثارا استياء محمود موسى، شاعر، ما دفعه للتفكير خارج الصندوق، وتكوين فريق من الشباب للقيام بـ«اسكتشات تمثيلية» تشرح قواعد النحو الغائبة، وعرضها على مسرح ساقية الصاوى: «بنقدِّم كبسولات لغوية لشرح القواعد بشكل مبسَّط، بالإضافة لبعض الألعاب والمحادثات اللى بتقدم معلومات لغوية، واسكتشات مسرحية بتترجم بعض قواعد اللغة على أرض الواقع». قرر «محمود» وفريق عمله التعبير عن هوايتهم بطريقة مبتكرة: «ناس من اللى بتحضر العروض خريجين لغة عربية، بيكونوا عاوزين يحسِّنوا من مستوى اللغة، لكن غالبية الجمهور شباب تتراوح أعمارهم بين 20 و30 سنة، وبعض كبار السن».
تعتمد فكرة «الكبسولات اللغوية» على تقديم قواعد اللغة بشكل ساخر وكوميدى، وتتنوع موضوعات الاسكتشات من عرض لآخر، بعضها يهتم بالهمزات وعلامات الترقيم وصوتيات الحروف، والبعض الآخر بقواعد اللغة المختلفة: «الفكرة عبارة عن عيادة بتصحح الأخطاء اللى بيقع فيها الناس طول الوقت خلال استخدامهم للغة، كل واحد من الفريق بياخد شخصية وبيمثلها». ويتكون فريق العمل من 10 أشخاص، بحسب «محمود»: «دلوقتى الفريق مكون من 10 ممثلين، بيطوَّروا من نفسهم وموهبتهم بشكل سريع وبيعبّروا عنها، لسَّه بالنسبة لى الأدوات اللى بنستخدمها فى العرض فيها صعوبة، زى إنك تمسك مايك طول الوقت، لكن بنحاول نتغلب عليها».
