ملابس تصنعها سمية للقطط والكلاب
"مصممة أزياء للحيوانات الأليفة" اللقب المحبب بالنسبة لسمية علي، منذ 5 سنوات، بعد أن قررت عمل تصميمات ملابس ترحم بها الحيوانات من قسوة برد الشتاء وتمنحهم شكلا جماليا خلال فصل الصيف.
عشقها للحيوانات جعلها تتعلم تفاصيل الحياكة وتسبح داخلها: "أنا مكنتش أعرف أي حاجة عن التفصيل بس بحب الحيوانات جدا كنت أما بشوف ملابس للحيوانات منتشرة في مجلات أجنبية كنت بغير جدا وبيكون نفسى إنى أقلدهم".
فى البداية امتلكت "سمية" أكثر من 22 نوع مختلف من القطط والكلاب: "كنت بقيس الباترونات عليهم، البيت بتاعى كان ضيق، وده كان بيشجعنى إنى افتح مشروع وأوظف من خلاله حبى للقطط والكلاب".
تنوع أنواع القطط والكلاب التى تقوم بتربيتها جعل سمية يكون لديها القدرة على عمل الباترونات المختلفة: "عندي باترونات كتير للقطط والكلاب بمختلف أنواعها، وده بيسهل عليا لما زبونة بتطلب حاجة مش بحتاج أعرف المقاسات بعرفها من مجرد النوع والحجم".
ملابس للكلاب والقطط من الأقمشة والأصواف: "الصوف هو أكتر خامة بتستعمل، أكبر هاي كول عملته لكلب كلفني ما يقرب من 5 شلل من الصوف ودي كمية كبيرة جدا، القطط بتكون مبسوطة بالدريسات اللي بتتعمل ليهم مش البداية مش بيألفوا عليها لكن بعد كده بيتعودوا وبيحبوها".
وبحسب "سمية" فإنها تقوم باستعمال كل الألوان في تصنيع الملابس فيما عدا اللون "الأبيض": "مفيش حد بيطلبه لأنه بيتبهدل بسرعة جدا مش عملي، لكن مفيش لون معين بيستفز الحيوانات".
وتتراوح أسعار الملابس بين 30 و 40 جنيه حسب المقاس: "في حاجات الكبيرة جدا بتوصل لـ 200 و250 جنيها"، وبحسب "سمية" فإنها تقوم فى الكثير من الأحيان بعمل بعض قطع الملابس بشكل خيري لقطط وكلاب الشارع: "في ناس بتطلبهم وأنا مش باخد عليهم مقابل مادى، بساعد فى عمل الخير ورحمة الحيوان وأخد الثواب".
تعليقات الفيسبوك