عمرو أديب
اشتهر الإعلامي عمرو أديب، بـ"كاريزما" ميزته عن غيره من الإعلاميين، إذ اشتهر بتعليقاته الطريفة وخفة ظله في العديد من المواقف.
تعليقاته الساخرة طالت الفنان والمطرب عمرو دياب، حيث حرص "أديب" على إظهار حقده وغيرته من "الهضبة" في أكثر من موقف، بشكل ساخر وظريف، والثنائي تجمعهما علاقة صداقة.
ونرصد لكم أبرز المواقف التي "حسد" فيها "أديب" الفنان عمرو دياب":
كانت آخر المواقف، في حلقة الأمس من برنامجه "الحكاية"، الذي يُعرض على قناة "MBC مصر"، حيث علق على احتفال دياب بعيد ميلاد دينا الشربيني، والذي لاقى مقطع الفيديو الخاص به تفاعلًا كثيفًا على مواقع التواصل الاجتماعي.
وقال: "يا ابني هتتحسدوا مش كده، طول عمرك يا عمرو عملنا مشاكل، خاف من الحسد يا ابني، اتهرينا تريقة بسببك خاف من الحسد ياحبيبي".
وأضاف "أديب": "كفاية فيديوهات بقى يا عمر، احتفلوا في صمت بينكوا وبين بعض، عشان أنا تعبت".
وفي واقعة أخرى، علق "أديب" على مقطع فيديو نشره الهضبة من داخل صالة الجيم ليعلق عليه ساخرًا: "تصحى الصبح تفتح تويتر تلاقي الأستاذ عمرو دياب بينكد عليك رسمي.. تشعر إن إنت متوفي إكلينيكيا.. إن إنت أنتهيت ومالكشي لازمة وإن إنت قطع غيار وصيني.. أنا بقوم من السرير و4 بيقوموني والأستاذ عمرو دياب بيعمل حاجات يعجز عن فعلها أي حد في ريال مدريد.. صحة مفرطة.. والمفروض إننا سن واحد".
وتابع: "بص السمانة.. بص الترابيس.. بص المجانص.. الأستاذ عمرو دياب بيقولنا ياصحة أوديكي فين.. الراجل صحته متفجرة.. يانهار أسود ومنيل.. واحد زيي ممكن يكمل إزاي في الحياه.. ليه يارب هو عمرو دياب وأنا عمرو أديب.. هو بس فرق الحروف.. لو كنت أنا عمرو دياب وهو عمرو أديب.. شعر وصحة وفلوس والبنات بتحبه، ورياضة غير طبيعية.. اللي بيعمله عمرو دياب ده يتحدى الحسد.. عمرو دياب بيقولي ياعمرو يا أديب موت بغيظك".
مناسبة أخرى أظهر فيها "أديب" حقده على الهضبة بنفس الشكل الساخر، وذلك حينما أصدر الفنان عمرو دياب أغنيته "عمرنا ماهنرجع زي زمان"، حيث قال: "عمرو دياب بقى عنده 26 سنة.. عمرو كل يوم بيصغر.. عمرو بيعمل أي شريط يحط فيه أي مزيكا بيخلص كله.. عمرو بيطلعله شعر وأنا شعري بيقع.. الراجل بيطلعله عضلات في وشه.. ده بيغيظني".
وفي فيديو آخر للإعلامي عمرو أديب في حلقة من برنامج "كل يوم"، المذاع على شاشة "أون لايف"، وبعد دخول عمرو دياب موسوعة جينيس: "أنا عندي مع عمرو دياب خلاف جذري.. عمرو دياب بيصغر وصحته بتكون أحسن، وبيتفوق أكتر وبيفضل جان وناجح وعبقري.. مفيش حسد بيأثر فيك.. يعني الصحة اللهم صلي على النبي تمام.. أنا في حياتي عاوزة أبقى عمرو دياب وعقدتي أبقى عمرو دياب".
تعليقات الفيسبوك