«طب حلوان».. أول كلية تطبق «المنهج المتكامل» منذ 3 سنوات: «تجربة سهلة وتستحق»
إسلام بيومى
قال الدكتور محمد فتح الباب، وكيل كلية الطب جامعة حلوان لشئون التعليم والطلاب، إنّ الكلية بدأت منذ نشأتها قبل ثلاث سنوات فى تطبيق ما يسمى بـ«حركة إصلاح برامج التعليم الطبى فى مرحلة ما قبل التخرج»، مضيفاً أن جامعة حلوان تعتبر من أوائل الجامعات على مستوى الجمهورية التى طبقت نظام المناهج الجديدة، أو ما يطلق عليها لائحة العلوم المتداخلة بين المجموعات التعليمية، حيث تعتمد الكلية نظام المنهج التعليمى المتكامل، لكن كنا نفعل ذلك وفق نظام الـ6 سنوات، وأصبحنا نفعله وفق الـ5 سنوات.
وأوضح «فتح الباب»: «أول دفعتين كانوا بالنظام القديم، والسنة دى أول دفعة نطبق عليها القرار الجديد، وبدأنا نعمل نظام المحاضرات المتكاملة، يعنى مثلاً بالنسبة للفرقة الأولى دكتور التشريح ودكتور الأمراض ودكتور الأشعة بيدخلوا نفس المحاضرة، ودكتور التشريح بيشرح، ودكتور الأمراض فى نفس الوقت بيبدأ يعلق على الأمراض اللى ممكن تحصل فى الجزء اللى بيتم تشريحه، والطالب بيقدر يشوفها فى الأشعة شكلها إزاى، الأمر الذى يستطيع الطالب من خلاله استيعاب المعلومة وربط العلوم الأساسية بالإكلينيكية».
وتابع «فتح الباب» أن «الكلية استطاعت تطبيق هذا النظام بنجاح بالنسبة لأول دفعة استقبلتها نظراً لكونها حديثة، فكان من السهل العمل به، وكان عندنا هيئة تدريس جديدة فكان متاح إنها تعمل حاجة مختلفة»، مشيراًَ إلى أن «طب قصر العينى بدأت فى تطبيق نظام الـ5 سنوات، الذى يعتمد أساساً على التكامل بين المناهج، فى الأول كانوا بيعتمدوا على إن الطلاب بيدرسوا علم التشريح كله، وبعدين علم الأنسجة ووظائف الأعضاء على مدار تلات سنين، وده اللى مبقاش موجود دلوقت فى ظل النظام الجديد».
"فتح الباب": نُدرس محاضرات متكاملة وأكثر من دكتور يدخلون للطلاب معاً لشرح أكثر من مادة مرتبطة.. و"إسلام": طريقة فعالة لرفع كفاءة الطلبة
وتعليقاً على طريقة التدريس فى الكلية يقول إسلام بيومى، الطالب بالفرقة الثالثة، رئيس اتحاد طلاب كلية طب حلوان، إنّ «نظام المحاضرات بحضور عدد من الأطباء متبع فى جميع السنوات الدراسية، إلا أنه يبدأ فى الانحسار مع تقدم السنوات». أما بالنسبة للطريقة المتبعة فى الامتحانات، يشير «إسلام» إلى أنّ الطلاب يخضعون لأربعة امتحانات خلال السنة: «عندنا فى السنة أربع مديولات بـ8 مواد، وبنقعد فى كل مديول شهرين أو 9 أسابيع تقريباً».
ويضيف رئيس الاتحاد أنه «يتم عقد امتحان فى نهاية كل مديول، يعنى بنمتحن بمعدّل كل شهرين، وبيكون من 400 درجة»، ويتابع: «لا يوجد امتحان فاينال فى نهاية العام الدراسى كما هو متعارف عليه فى مختلف الكليات، بنمتحن فى نهاية سنة تالتة على كل التلات سنين اللى فاتوا فى امتحان واحد، فى محاولة منهم إنهم يعودونا على امتحان مزاولة المهنة والبورد المصرى وغيره».
"بيومى": نمتحن 4 مرات فى السنة و"معندناش فاينال غير فى آخر تالتة".. والتعديل يجهزنا لامتحان مزاولة المهنة
ورغم ما يلاقيه الطلاب من ضغوط نتيجة ذلك النظام إلا أن «إسلام» يرى أنها «طريقة فعّالة لرفع كفاءة الطلاب، بنتعب فى الأول بس لما بننزل تدريب فى المستشفيات سواء فى أقسام الطوارئ أو العيادات الخارجية، بنشوف بعنينا الفرق بينا وبين طلاب الكليات التانية».