ثوار عاطلون عن العمل يتظاهرون بـ«جلابية مقطعة وشعر منكوش» وهتاف: «عشان نوصل للحرية.. هاتوا العادلى وزير داخلية»

«البس جلابيتك المقطعة، انكش شعرك، وهات معاك طبلة قدام مستشفى الأمراض العقلية.. تمام انت كده من ثوار يناير».. دعوة تلخص حالة ما يزيد على 200 شاب شاركوا فى ثورة يناير، قرروا التعبير عن غضبهم من حكومة العواجيز، بالخروج عن المألوف. الحال التى لم تتغير منذ اندلاع الثورة إلى الآن دفعتهم لرفع الشعار «يبقى الحال على ما هو عليه وعلى المتضرر اللجوء للميدان»، هذه المرة قرر «محمد» -الشاب الثلاثينى- وأصدقاؤه الابتعاد عن التحرير، ليحل محله ميدان العباسبة محددين تظاهرهم يوم 11 فبراير، فى ذكرى تنحى الرئيس الأسبق مبارك، لكن تظاهرهم سيكون ضد ترشح المشير السيسى للرئاسة، من خلال عروض ساخرة تطالب بعودة روح يناير تحت شعار «عشان نوصل للحرية.. هاتوا العادلى وزير داخلية». محمد على، من الشباب الذين أصروا على المبيت فى الميدان 18 يوماً قبل تنحى مبارك أملاً فى تغيير مفهوم الحريات عند الشعب، فوجئ أن المواطنين «مش بيطوروا من نفسهم ومصرين على تمجيد وتعظيم الشخص مش الفكرة». «ما دام أحمد عز بقى مناضل، وزكريا عزمى بطل، وحسنى ثورى، ليه مايرجعوش تانى على الأقل يوم ما مشيوا بشرف، وماكانش فيه كمّ الدم اللى بيحصل فى الشوارع دلوقتى؟». قالها الشاب الثلاثينى العاطل عن العمل بسخرية، مشجعاً زملاءه للاشتراك فى الوقفة التى أكد أنها سلمية وصامتة ليس بها سوى رفع لافتات وقرع بالطبول. «عشان مصر تفضل وسية.. هنموّت كل الثورجية»، «افتح محضر واثبت حالة، الداخلية كلها رجالة»، «يسقط الضمير الثورى».. جزء من الشعارات الساخرة التى يريد «محمد» وباقى المتظاهرين رفعها فى وقفتهم.. «إحنا نموت ولا نسيب البلد تبقى تكية، أمال عملنا ثورة يناير ليه؟ ولو مش عاجبهم قدامهم حل من الاتنين يا إما يرجّعولنا صحابنا اللى ماتوا فى الثورة لأن موتهم مالوش لازمة، يا إما يخلونا نحصلهم أو يوفرلونا عنبر فى السرايا الصفراء ومايجبوش سيرة الشباب على لسانهم، لأن ده جيل عبد مرسى ولبّس عياله فوق روسهم بيادة.. يعنى كده كده ضايعين».