«عابدين» يصلح البطاقات التموينية التالفة
تعرُّض الكروت الخاصة بصرف السلع التموينية للتلف بسبب حدوث خدش أو كسر، وخوف المواطنين من فقدان حصصهم التموينية أثناء استخراج بدل فاقد، دفع محمود عابدين، صاحب محل بيع إكسسوارات السيارات فى العمرانية بالجيزة، إلى تقديم خدمة جديدة داخل محله، وهى ترميم وإصلاح «كروت التموين»، من واقع تجربة خاضها مع «كارت» شقيقته الذى تعرض للكسر بسبب سوء الاستخدام: «لما صلحت الكارت لأختى قالت لى ده رجع زى الأول بالظبط، وبعدها جالى كذا حد عملت له الكارت ببلاش، ولما لقيت فيه إقبال قررت أعملها خدمة جديدة فى المحل وبمقابل».
«هنا يوجد تصليح لبطاقات التموين»، لافتة وضعها «عابدين» على المحل ليجذب أصحاب البطاقات التالفة، التى يقوم بإصلاحها فى مدة لا تتجاوز 10 دقائق.
يعمل «عابدين» بدقة ويراعى أثناء عمله ألا يقع اللاصق السائل على الشريحة الموجودة بالبطاقة: «هى أكتر حاجة بنحافظ عليها عشان لو اتخدشت، الكارت مش هيقرا على الماكينة بسهولة».
وتتراوح أسعار التصليح بين ٥ و١٠ جنيهات: «بعملها بسعر على قد مصنعية الإيد بس، والناس مسميانى الساحر عشان بارجّع لهم البطاقة زى الأول».
تعليقات الفيسبوك