«مرسي» لـ«العوا»: أنا محتاج فلوس علشان أعيش.. مينفعش فلوسي اللي في الأمانات تخلص
ألح الرئيس المعزول محمد مرسي على الدكتور محمد سليم العوا في طلب إيداع مبالغ مالية في الأمانات الخاصة به، في الحوار الذي دار بينهما داخل إحدى غرف أكاديمية الشرطة -مقر محاكمته- والتي انفردت "الوطن" بنشره.
وأبدى المعزول احتياجه الشديد للأموال داخل سجن برج العرب، وطلب من "العوا" بأن يجد حلا لهذه المشكلة حتى لو يتم إعطاؤه الأموال خلال جلسة المحكمة.
وجاء الحوار كالآتي:
■ «مرسي»: فيه نقطة أنا عايز حضرتك تتكلم فيها، مش عارف رئيس المحكمة ولا مين، أنا محتاج فلوس في الأمانات، فدلوقتي معنديش زيارات، لا محامين، ولا أهل.
- «العوا»: والفلوس دي لازم تتدفع في إطار زيارات، ولاّ إيه؟
■ «مرسي»: أنا معرفش، يعني دلوقتي أنا محتاج يبقى في حسابي فلوس علشان أعيش.
- صوت آخر (يبدو أنه لأحد فريق الدفاع): طب ما ده ممكن حوالة يا دكتور.
■ «مرسي»: ما هي الحوالة، دلوقتي السجن بيقول مجاش حاجة، لازم أصدق الناس.
- الصوت: هي بتاخد وقت بس.
- صوت شخص ثانٍ: مين اللي قال لحضرتك بعت؟
■ «مرسي»: المرة اللي فاتت لما كنا هنا كان يوم التلات، قالوا هنبعت بكرة، اللي هو الأربع، قالوا هتوصل في نفس اليوم.
- «العوا»: دلوقتي هسأل المحامين مين اللي عمل كده.
■ «مرسي»: أسامة.. أسامة مش ابني.
- «العوا»: أسامة الحلو؟ موجود.
■ «مرسي»: أسامة الحلو لو كان دخل النهارده.
- «العوا»: مش عارف دخل ولا لأ.
■ «مرسي»: إحنا عايزين نشوف لها حل، يعني القاضي، إلا إذا أنتم تجيبوا فلوس قدام القاضي وتدّوها لحد من الظباط، يعني قصدي نعمل إجراء، مينفعش فلوسي اللي في الأمانات تخلص.
- «العوا»: لأ، مينفعش.
■ «مرسي»: لأن إحنا لينا مصاريف، واخد بالك، ومصلحة السجون لها.
- «العوا»: هي طبعا لها قواعد
■ «مرسي»: لها قواعد؟
- «العوا»: وأسس، مش هيصرفوا على محبوس احتياطيا على حسابهم.
■ «مرسي»: مش هيصرفوا علينا يعني.
- «العوا»: طبعا، لأ دي نخلصها دلوقتي إن شاء الله يا إما مع الدايرة (يقصد المحكمة)، يا إما مع مصلحة السجون نفسها، نبعت حد.
الأخبار المتعلقة:
البرغوتي عن انفراد "الوطن": مرسي لا ينطق اسم السيسي في التسجيل مطلقا
«مرسي»: أنا في أحسن حالاتي معنويا وعقليا.. و«العوا» يرد: الحمد لله
«المعزول» عن «السيسي»: هو مش خايف من الانقلاب.. ما هو اللي بيَنقلب بيُنقلب عليه
بالفيديو| «المعزول» عن «السيسى»: هو رقّى نفسه لـ«مشير» ليه دلوقتى.. علشان لما يبقى رئيس ما يبقاش فيه حد أقدم منه.. ولا علشان ما يبقاش أنا اللى عملته؟