الضغوط النفسية والصحية التى يتعرض لها الطلاب خلال فترة الامتحانات، خاصة عندما تتزامن مع شهر رمضان، دفع أصحاب مقهى خاص بالسيدات فقط، فى مدينة المنصورة، إلى تجهيزه كخيمة رمضانية لإضفاء أجواء الشهر الكريم على الطالبات، وفى الوقت نفسه تجهيزه ليكون مكاناً مناسباً للمذاكرة.
لاحظ مصطفى محمود، مسئول الكافيه، غياب شريحة كبيرة من الطالبات مؤخراً، ولحرصه على استقطابهن مرة أخرى، زين المقهى ليكون كالخيمة الرمضانية وفى الوقت نفسه وفر مكاناً خاصاً للطالبات يسمح لهن بالمذاكرة فى هدوء: «حطينا خيامية وزودنا الإضاءة عشان الطلبة يقدروا يذاكروا، وفى نفس الوقت يحسوا بشهر رمضان ويقعدوا مع بعض، ومايبقاش ضاع عليهم أجواء الشهر الكريم». يستقبل المقهى الطالبات حتى 12 بعد منتصف الليل، ويضع قائمة طلبات بأسعار بسيطة تناسبهن: «معندناش حاجة غالية، أسعار المشروبات فى المقهى بتبدأ من 10 لحد 30 جنيه».
يضع «مصطفى»، أيضاً، قائمة بطلبات خاصة بوجبات السحور: «فيه بنات أو ستات بيوت بيبقوا حابين يغيروا جو ويقعدوا قعدة حلوة مع بعض»، ويحرص على أن يكون طاقم العمل كاملاً داخل الكافيه من السيدات فقط: «عشان نحافظ على خصوصية البنات اللى بتجيلنا بيكون كل اللى شغالين بنات حتى أنا مقدرش أدخل المكان غير لما يمشوا كلهم»، يمتاز الكافيه بجو هادئ يمكن الطالبات من المذاكرة فى فترة الامتحانات: «مش بنشغل التليفزيون، طول ما هما قاعدين بنقفله عشان يعرفوا يركزوا»، ومنذ إعلانه عن افتتاح المكان لاستقبال الطالبات، لاقى استحسان الكثيرات: «بقى فيه بنات مهتمة وبتسأل عن الحجوزات».
تعليقات الفيسبوك