نشوى مصطفى: "بطلت مسلسلات المقاولات من وقت ما خلصت أقساط"
نشوى مصطفى
أكدت الفنانة نشوى مصطفى، أنها لن تُشارك في أي مسلسلات، التي وصفتها بـ"المقاولات"، مبررة ذلك بقولها: "مش هشتغل غير باللي مقتنعة بيه، مش هقبل بأي أدوار من غير أيدين ورجلين لمجرد التواجد.. ده قرار نهائي أخدته من ساعة ما الأقساط خلصت".
وكتبت "نشوى"، عبر حسابها الشخصي على موقع التواصل الاجتماعي "فيس بوك": "الحالة دي تمس فنانين كتير غيرى مجبرين يقعدوا على كراسي المتفرجين - الكلام اللي فات ده فضفضة – سامحوني - ويمكن بعد شوية أندم إنى عملت كده وامسح كلامي لو حسيت إن كلامي حايهين كبريائى كفنانة".
وقالت: "منتهى الإحباط أن الفنان يبقى قاعد متعطل عن ممارسة فنه، مش مؤمنة بحكاية الشللية لأن طول عمرى ماليش شلة كل الناس أصحابي، ومش مؤمنة أن الموهبة بتفرض نفسها لأن اللي شايفينه معظمه بينفي النظرية دي وحكاية الموهبة بتفرض نفسها دي وهم إلا فيما ندر، مجبرين بفعل فاعل نقبل بعض عديمي الموهبة يتصدروا المشهد ويبقوا واجهة مصر الفنية".
وتابعت: "مؤمنة بموهبتي جدًا بدليل أنى لما عملت مسرح عشان اختبر نفسى في أصعب أنواع الأداء (مونو دراما)، الحمد لله أتأكدت من رد فعل السادة الجمهور على مختلف مستوياتهم أنهم مصدقنى لدرجة التوحد، مؤمنة بأن الناس بتحبني كممثلة باختلاف مستوياتهم برضوا".