«روبابيكيا» فى معرض فوتوغرافيا: أى حاجة قديمة للبيع
ضبة قديمة لباب أثرى، نافذة عامرة بالأتربة، مهترئة، تغطيها أقمشة قذرة، قفل باب صدئ، إطار دراجة منسى.. هى الأدوات التى احتواها المعرض الفوتوغرافى «روبابيكيا» للفنانة ريهام السنباطى، والمقام حالياً فى مركز «دوم الثقافى»، معلنة أن ما لا يلزم البعض، يلزمها هى فنياً، ويمكن تحويله إلى معرض فنى كامل!
الفنانة الشابة وجدت فى قطع الحديد الصدئة، والحقائب الجلدية المتهرئة، إلهاماً، جاعلة من أعشاش العنكبوت والأسطح القذرة، صوراً فنية يأتى الزوار لرؤيتها، وتقول «ريهام»: «بدأت الفكرة على سطح البيت، عندى فوق سطوح بيتنا كل اللى مش عاوز حاجة بيرميها، أنا لما بطلع بشوف فى الكراكيب حاجة مختلفة، قررت أصورها وأورى الناس أنا شايفة إيه بعنيا، الحاجات المهجورة مش مجرد كراكيب، الحاجات دى مش لازم تترمى، ممكن تستخدم فى ديكور والمصورين الفوتوغرافيين يعملوا منها معارض».
المعرض الذى يتضمن جزأين التقطت المصورة بقية لقطاته فى حى الحسين، داخل محال الأنتيكات، التى وصفتها ريهام بأنها: «عالم تانى، يا ريتنا كمصريين نعيد اكتشاف نفسنا واكتشاف تفاصيل تاريخنا، محلات الحسين بتبيع أنتيكات قديمة رائعة، لكن عشان مفيش سياحة، المحلات واقفة وحالها صعبة، يا ريتنا نروح نتفرج ونقدر تاريخنا شوية وما نعتبرهوش مجرد روبابيكيا»؟ تنظر «ريهام» إلى «الروبابيكيا» بنظرة فلسفية: «فى ناس عندها تقدير للحاجة القديمة لو برطمان فيه جبنة بتشيله، وفى ناس بتعيد استخدام الحاجات اللى بتستغنى عنها وناس تانية تتخلص منها وتديها لبتاع الروبابيكيا اللى بيقوم بدور عظيم فى إنه يوظف الحاجات غير المرغوب فيها ويوصلها لناس محتاجاها، أنا بقوم بنفس الدور من خلال المعرض».