«مالك» نكاية فى الإخوان: «بحط صور حمدين والسيسى فوق صور مرسى»

خلفيته السابقة عن جماعة الإخوان وأنصار الرئيس المعزول محمد مرسى، جعلته يتوخى الحذر فى المرة القادمة بعد فتح باب الترشح للرئاسة، ويطالب بـ«البرنامج الانتخابى أولاً»، فهو لا يأمل بإصلاح دخله، ولا معيشة أكثر رفاهية، وإنما يريد الصالح العام للشعب بعدما عجز الإخوان عن تحقيقه. يجلس محمد مالك على كرسيه البلاستيكى، يتابع منهمكاً التليفزيون داخل كافيتريا والده بمنطقة السلام عين شمس، يلمح من بعيد مجموعة شباب يتجهون صوبه يحملون صور الرئيس المعزول محمد مرسى، وإذ فجأة بدون «إحم ولا دستور» يعلقون بوستراته على جدران القهوة.. مشهد لا يغيب عن بال الرجل الأربعينى رغم مرور قرابة العامين على الانتخابات الرئاسية الماضية.. «المشكلة إنهم كسبوا ووعدوا وفى الآخر بنلاقيهم على أول الشارع يهتفوا ويتظاهروا ولا حياة لمن تنادى»، عندئذ قرر أن يحاربهم بالمكيدة بعد أن سمح لمجموعة شباب من حملة المرشح الرئاسى المحتمل حمدين صباحى بلصق صوره فوق صور المعزول وهو يردد: «هو كان فى الوقت ده الرجل الأصلح وماكانش كمان عندنا وعى كافى، لكن السنة اللى مرت علينا واحنا ماشيين جنب الحيط عشان مفيش أمن ولا أمان خلتنا اتعلمنا الدرس ولازم اقرأ البرنامج الانتخابى أولاً لكل مرشح». شارع مظلم، سرقات متكررة، بيوت من عشش على قضبان السكك الحديدية، هى المشاهد التى يراها الأب لثلاثة أبناء فى منطقته التى يصفها بأن نصفها عشوائى والنصف الثانى متمدن: «لما أشوف المناظر دى كل يوم مش بعيد الناس الجعانة دى تسرق عربيتى أو تخطف عيل من عيالى، محتاجين اللى جاى يبقى قلبه على البلد ويحقق العدالة الاجتماعية».