م الآخر| عن "المصريين اللي مش بتوع شغل" والبشر اللي بتفطر كونتننتال

بعد توقفي كام سنة عن الكتابة نظرًا للظروف السياسية الشقلباظية التي مرت وما زالت تمر بالبلاد، وكله كان بيكتب في السياسة ويفتي وأنا محبتش أفتي أو كنت بفتي على صغير مش لدرجة إني أكتب الفتوى في نوت.. هههه. ما استفزني لكتابة الموضوع طبعا غير شغلي اللي أنا فيه بقالي 6 سنين، برنامج ع الراديو كانوا بيناقشوا فيه الحادثة بتاعت عامل مصنع عصفور اللي ضرب نائب رئيس مجلس الإدارة بالرصاص، قوم المذيع قالك متوصلش لضرب النار مهما كان مظلوم (طبعا أنا مع الرأي ده) و لكن قوم تيجي واحدة تكلمه ع التليفون وإنها تعرف حد كويس في الشركة (أغلب كلامها بالإنجليزي) وإنها تعرف القصة كويس وإن الراجل طلع ع المعاش عادي جدا من كذا شهر وخد بالك من اللي جاي "أخد مستحقاته كاملة".. هههه.. آه والله قالت كده.. هي قالت كده وأنا روحت قايل.. آه يا ولاد الـ......... اللي ميعرفوش الناس اللي بتتكلم إنجليزي وتفطر كونتنتال وتكلم الراديو، إن اللي بيمشي حد من شركة بيمضّيه على إنه استلم مستحقاته قبل ما يسلمه ربع جنيه..وأغلب الشركات الخاصة بتمضّي الموظفين على استقالة وهي بتمضي معاهم العقد عشان لما يرفدوه ميشتكوهمش في مكتب العمل، قوم تيجي المودام تقولك "أخد مستحقاته كاملة"! لا يا شيخة !!. جملة بنسمعها كتير وممكن نقولها كتير "أصل المصريين مش بتوع شغل"، وفي زيها "أصل المصريين لازم ياخدوا فوق دماغهم عشان يشتغلوا" وممكن بدل "فوق دماغهم" يبقى "بالجزمة" أو "بالكرباج". اللي أبدع الجملة دي في الأصل هم أصحاب الشركات ورؤساء مجالس إداراتها وبتوع شؤون العاملين اللي قاعدين في مكاتبهم، ونجحوا في نشر هذه الأكذوبة في المجتمع حتى أنها تحوّلت إلى حقيقة ثابتة زي إن الشمس بتطلع من الشرق وبتغرب من الغرب.