شركة توظِّف طلاب الثانوية فى الإجازة: تحمَّل مسئولية نفسك

10:16 م | الاثنين 22 يوليو 2019

المبالغ الكبيرة التى يدفعها أولياء أمورهم نظير حصولهم على دروس خصوصية فى الثانوية العامة، جعلتهم يتحملون المسئولية مبكراً ويفكرون فى العمل خلال فترة الإجازة الصيفية، لتخفيف الأعباء المالية عن كاهل أسرهم.

صفاء أحمد، مسئولة بشركة أثاث، تصف الإقبال على عمالة الشباب منذ بداية فصل الصيف بالكثيف جداً: «إحنا بنشترط صورة من البطاقة أو شهادة الميلاد فقط لا غير، وبيشتغلوا عندنا عمال وشيالين، بيساعدوا أهلهم وبنعلمهم الاعتماد على النفس، وبياخدوا خبرة فى مجال الأثاث».

"صفاء": المرتب 1500 جنيه.. ومعظم العاملين يجمعون مصاريف الدروس

وبحسب «صفاء»، فإن مدة العمل لا تتجاوز 4 أشهر: «إحنا عملنا إعلان، ومعظم اللى قدموا وقبلناهم طلبة فى ثانوية عامة، بيشتغلوا عشان يوفروا ثمن الدروس»، 1500 جنيه هى قيمة المرتب الذى يحصل عليه الطالب شهرياً: «الطلبة اللى تم اختيارهم بيشتغلوا فى وضع المنقولات على الأوناش، ومن الأوناش لمحل السكن، وظيفة سهلة وبيساعدوا بيها نفسهم».

«اتعودت الاعتماد على النفس»، كلمات يرويها أشرف وائل، 15 عاماً، الذى اعتاد على العمل خلال فترة الإجازة تاجراً للفاكهة: «باشتغل من صغرى، المهم ما أقعدش فاضى أو خالى من الشغل». وبحسب قوله، فإنه يقوم باستغلال الراتب الذى يحصل عليه فى سداد مصاريف الدروس الخصوصية: «أبويا بيعلّمنى أعتمد على نفسى، عشان أكون راجل لما أكبر، أنا باشترى لبسى بنفسى، وبساعد كمان إخواتى الأصغر منِّى».

وجد نفسه فى مجال صيانة التكييفات، عبدالله سمير، 17 عاماً، طالب بالصف الثالث الثانوى، من منطقة السيوف بالإسكندرية: «دى أول إجازة أشتغل فيها، باشتغل مع واحد صاحبى، باكتسب خبرات وباساعد نفسى، المصاريف بقت غالية أوى»، وبحسب «عبدالله» فإن راتبه الشهرى يتراوح بين 600 و700 جنيه: «ده راتب ثابت، غير الفلوس اللى ممكن تطلع لى فى اليوم، أنا أهلى مش محتاجين ده، لكن حابب أكون راجل من صغرى».