«أحمد» يعرض ملابسه مجاناً فى الشارع
ملابس العيد مجاناً لفقراء «المطرية»، قرار اتّخذه أحمد محمد، صاحب محل ملابس، مراعاة لظروف المواطنين، فى ظل ارتفاع الأسعار، من خلال تنظيم معرض للأهالى، رافعاً شعار «خُد اللى يناسبك خلينا نفرح».
ملابس تناسب جميع الأعمار، عرضها «أحمد» لغير القادرين، مستغلاً الساحة الخالية أمام المحل المتواضع: «الهدوم كلها جديدة، ومفيش أى عيب فى قطعة، كأنهم بيشتروها من أحسن محل، دى أمانة وعهد قطعته على نفسى».
افتتح «أحمد» المعرض، بعد ملاحظة الإقبال المحدود من أهالى المنطقة على الشراء قبل العيد: «فى المواسم، كان الناس بيشتروا من بدرى، ويدفعوا أسعار على القد، على عكس دلوقتى، فقررت أسهل على الناس الدنيا وأفرّحهم بالعيد»، حيث تفتح أبواب المعرض أمام كل المواطنين من بعد الظهيرة، وحتى 11 مساءً.
«الناس كانوا مكسوفين فى الأول ياخدوا هدوم ليهم وعيالهم، لحد ما بقيت آخدهم بنفسى، وأفرّجهم على الهدوم، وآخد رأيهم فى الحاجة اللى عاجباهم»، يقولها «أحمد»، الذى فوجئ بالإقبال الكبير للمواطنين بعد مرور عدة أيام من افتتاح المعرض: «الناس اتبسطت جداً من التجربة، وهاكررها دايماً فى المواسم والأعياد، علشان أفرّح كل الناس، ومحدش ييجى عليه العيد، وهو مش لابس هدمة جديدة وفرحان».
تعليقات الفيسبوك