تسريحة الرستا
مع اقتراب العام الدراسى الجديد، قامت صالونات تجميل بعمل عروض خاصة على تسريحة الرستا الأفريقية، بسبب إقبال أولياء الأمور على تنفيذها لأبنائهم، باعتبارها موفرة للوقت والجهد. نورا محمدين، صاحبة كوافير فى محافظة الإسماعيلية، تصف الإقبال على طلب «الرستا» بالجيد، خاصة من صاحبات الشعر الكيرلى: «هى موضة جداً السنة دى، وفيه أطفال كتير بيحبوا شكلها، وده السبب إننا بنعمل عليها عروض خلال فترة الصيف والدراسة». وبحسب «نورا» فإن التسريحة تظل ثابتة لمدة شهرين: «بتفضل زى ما هى على الشعر، ممكن بس بعد فترة نثبتها ونعيد عليها».
سها الوليد، صاحبة كوافير بمدينة الشروق، تروى أن الأطفال الأكثر إقبالاً على «الرستا» تتراوح أعمارهم بين 10 و15 عاماً: «الإثيوبيون والسودانيون هما أكتر ناس بتعملها بمهارة، وبعضهم بيشتغلوا عندى بحرفية». وتتراوح أسعار الرستا بين 300 و350 جنيهاً، وفقاً لـ«سما»: «فيه ناس بتحب تعملها للشعر بالكامل، وفيه بيكتفوا بضفيرتين أو ثلاثة بالكتير عند القصة من قدام، وضرورى غسل الشعر المصفف بضفائر الرستا برفق، عشان الشعر مايفكش ويتبهدل شكله».
ويحذر عماد سليمان، خبير تجميل، من عمل «الرستا» باستمرار: «على المدى البعيد ممكن تتسبب فى تقصف الشعر، ولازم عناية مستمرة للشعر بوضع حمام كريم وغيره من المستلزمات الضرورية للشعر». وينصح «عماد» باستخدام خيوط بيضاء لعمل ضفائر «الرستا»، حتى تتناسب مع الزى المدرسى، واصفاً الشعر بعد الانتهاء من تصفيفه باللوحة الفنية، التى تحتاج لوقت طويل فى تنفيذها: «مش أى كوافير يقدر يعملها، لازم يكون متمكن عشان الشعر مايبوظش، أو يشده جامد من جدره ويأثر على الجلد وفروة الشعر».
تعليقات الفيسبوك