م الآخر| الصنف إيه!

إنسان ..ومن حقى أكون إنسان.. وبس وفقط.. بدون تصنيف ورق وخانات كتير وكتير عيون الصنف إيه؟ الصنف وكسه! أيوه يا ستي ذكر و أنثى ذكر و أنثى؟ نصرة ونكسة؟ هيبة وكارثة؟ حسرة ..و فـَرسة هو إحنا لسه؟ هنّام ونصحى ف الهم لسه؟ أنا ابن آدم و خلاص يا سيدنا.. زيّك وزيّه مش ناقصة ايدك ولا ناقصه رجله بالعكس يمكن.. بالعند فيكو أنا إللى أصلا كتير عليكو الست ود ودفا و حنين الست نسمة وحيط أنين الست دنيا لو تفهموا! الست راجل ف الشدايد والضنا الست نور وأمواج هنا الست أجمد م الحديد الأنثى نور وصباح جديد وأمل بإيدها بتعمله وتجمّله وبتديهولك بالرضا عشان ايديك تستعمله أنا مش مربع عنده صح ف ورقة باهته أنا أرض ثابته أنا أصل بيتك واللى مايصونش الأصول ..يبقى غشيم محتاج دروس و أيام علام محتاج يحس..قبل الكلام محتاج يقدّر..قبل ما يسأل بكام أنا مش كيان ف الضل مبنى أنا أم ابنى أنا التاريخ أنا الزمن ملكة وأم ومدرسة أدت كنوز من غير تمن أنا ست أيوه.. أنثى يا بيه حرمة يا فندم . متعة سعادتك.. وسكن جنابك.. وماما ابنك.. البطل! ومخدة الدمع اللى يوم ف عنيك هطل وجريت عليها تشكى هم الدنيا ليها واللى سمعت و اللى حست واللى دادت و اللى ربت واللى لما غبت عنها .. صانت عشرتك وحضرتك لما فتحت بقها بصيت بسخرية السنين "هو إنتى مين"! أما صحيح دول ناقصات عقلٍ و دين بركة إن كامل حضرتك جهبز زمانك و ع العموم أنا جنتك و أنا أمانك فكّر ف حل وعيد كمان لأحسن أكون ...سبب جنانك!