م الآخر| علي الأسفلت
أنا المرمي في عز التلج
مانيش طالب يكونلي برج
أنا اللى أقصي طموحاتى
يساوني يا ناس بالكلب
لا أنا طمعان في سلطة وجاه
ولا القصر اللى كله حياه
أنا أصلا مانيش عايش
ولا بحلم بأي حياه
أنا اللى غدايا مـ الزبال
ولما تهفنى نفسي على عشوة وكيس شيبسي
أروح مطعم أبات أنبش في فضلاته
أطلع كل خيراته
أنا اللى شافونى نايم يوم
على الأسفلت قالوا قوم
هنعمل ثورة يا غلبان
عشان ما تنامشي تانى جعان
جريت ناطت من الفرحة
عشمت وعشمي في محله
عملت الثورة يا حلو
ومن يومها.. زاد جوعى وزاد تعبي
بقيت بالبرد متعبي
أصاحب جوعي وعيايا
وأحس بموتي جوايا
(ملحوظة: الآراء المنشورة في قسم "م الآخر" كتبها القراء، ولا تعبر بالضرورة عن رأي موقع وجريدة "الوطن"، وإنما تعبر عن آراء أصحابها)