"فتحية" تكشف "كذب الإخوان": "هي العيال فاهمة الدراسة عشان تفهم الإضراب"

في الثامنة صباحاً، وقف طلاب مدرسة دار حراء الإسلامية بمحافظة أسيوط في "حوش" المدرسة، وأدوا تحية العلم، وخرجوا من صفوفهم في محاولة للوصول إلى الفصول، حتى التقطت "عدسة الإخوان" هذا المشهد في محاولة لاستغلاله كعادتها، بعدما تفاجأت "فتحية محمد" والدة الطالب يوسف، بنشر هذه الصورة على الصفحة الرسمة لـ"حزب الحرية والعدالة" على "فيس بوك"، معلّقين عليها "إضراب طلبة وطالبات مدارس دار حراء الإسلامية صباح أول يوم دراسي، وذلك تنديداً باقتحام الأمن لمدارسهم وتغيير الإدارة وفرض رقابة من قِبل الأمن الوطني". ودفع هذا السيدة الأربعينية لتوضيح الموقف والكشف عن الأكاذيب التي تستمر فيها الجماعة الإرهابية، "حتى العيال مش سايبنهم في حالهم، لقيت ابني بيقولي يا ماما دول نزلوا صورنا على الفيس بوك في أول يوم دراسة، فرحت وقولت أكيد عشان يأكدوا أن الدنيا مستقرة، لحد ما لقيتهم مستغلين إن العيال متجمعين وطالعين الفصول وكاتبين عليهم إنهم مضربين واقتحامات وكلام محصلش"، مضيفة "دي مدرسة أكبر حد فيها في 3 ثانوي، مظاهرات مع الشرعية إيه اللي يعملوها، هما فاهمين الدراسة عشان يفهوا الإضراب والكلام الكذب ده".[SecondImage] وأوضحت "فتحية" أنها حاولت أكثر من مرة نقل ابنها من المدرسة، لكنها لم تنجح في ذلك "عرفنا إن أي حاجة تبع الإخوان بعد قرار إنهم جماعة إرهابية هتتقفل، والمدرسة كانت تبع الإخوان فحاولت بعدها أنقله بس منفعش عشان هو في تانية إعدادي، وفاضله سنة ويخلّص المرحلة دي، فقولت أسيبه السنة دي وأنقله السنة الجاية عشان المشاكل، وبعد ما وزير التعليم طلّع قرار إن الوزارة مفيش نية إنها تقفل المدارس اللي تبع الإخوان عشان مستقبل الطلاب وإنهم هيبعدوا الإخوان عنها تمامًا"، مشيرة "ابني دخّلته المدرسة دي من سنتين، لو كنت أعرف من الأول إنها تبعهم مكنتش دخلته فيها، وعشان كده قولت مسكتش على كدبهم اللي مصدقين نفسهم فيه لحد ما ربنا يخلّصنا من شرهم خالص، ويسترها على البلد".