حل المشاكل بطاقة التموين بالمبادرات التطوعية
«وداعاً للطوابير»، شعار رفعه مجموعة من الشباب فى محافظة الجيزة لمساعدة السيدات وكبار السن على حل مشاكل البطاقات التموينية دون عناء. عادل سعد، صاحب الفكرة، يساعد أهالى المحافظة من السيدات مقابل الحصول على أجر رمزى: «بساعدهم فى حل المشاكل اللى بتواجههم، وهما بيروحوا على الاستلام فقط، فيه ستات كتير بتكون محتاجة ده سواء سيدات مطلقات أو أرامل أو كبار فى السن، إحنا بنوفر عليهم البهدلة والزحمة».
تقليل التكدس داخل مكاتب التموين، هو الدافع لتنفيذ الفكرة حسبما ذكر «سعد»: «الإجراءات بتاخد وقت، وكتير بيروحوا أكتر من مرة لمكتب التموين، الفكرة دى بتقلل من فكرة التكدس داخل مكاتب التموين، والزحمة اللى صعب إن كتير من أهالينا كبار السن يتحملوها وده اللى بنحاول نراعيه»، نجاح الفكرة جعل «سعد» يفعّل طريقة قوائم الانتظار لقبول الطلبات: «مش بقبل أكتر من 10 حالات وبعدها 10 آخرين وهكذا عشان نقدر إننا نساعد الناس بضمير».
بخلاف المساعدات التى يقدمها للسيدات فى البطاقات التموينية، يساعد «سعد» السيدات فى خطوات استخراج كل الأوراق الحكومية: «إحنا بنساعد وبنجهز كل الأوراق المطلوبة معاهم وبنساعدهم يجهزوا نفسهم، فيه سيدات كتير كبار السن معندهاش أولاد وبتكون محتاجة مساعدة».
تعليقات الفيسبوك