عادل إمام: اسمي فتح لي أبواب الشهرة.. و"بيكسر الحواجز بيني وبين الآخرين"
عادل إمام
عادل إمام، 22 عاماً، يعمل مدرب تنمية بشرية، استطاع أن يحظى بشهرة واسعة بين الحضور بسبب تشابه اسمه مع الزعيم عادل إمام، كما أن هذا التشابه يجعله مميزاً بمجال عمله، يكفى أنه ينطق اسمه لمرة واحدة فقط، يمكن حفظه وتذكره بسهولة: «اسمى بيفيدنى وأنا فى المحاضرة إنه بيكسر الحاجز بينى وبين الحضور، مجرد ما يسمعوا اسمى يضحكوا عشان بيربطوا بين الاسم وبين أسطورة الضحك الزعيم».
مدرب التنمية البشرية: "أستاذى فى الجامعة سألنى اسمك إيه؟.. ولما رديت قال لى: انت بتهزر.. اطلع بره"
ويساعد هذا التشابه المدرب الشاب فى الترويج لنفسه عبر برامج الراديو التى يحل ضيفاً بها: «معدو البرامج اللى بيستضيفونى كمدرب تنمية بقالى 3 سنين فى المجال بيذيعوا البرومو من قبلها باسم عادل إمام وتبقى الناس قاعدة مستنية الحلقة وعدد المستمعين بيزيد».
أحياناً يسبب له اسمه مواقف محرجة: «مرة كنت قاعد فى محاضرة وبتكلم والدكتور بتاعى شافنى فندهنى بيقولى اسمك إيه؟ قلت له عادل إمام، قالى طب عشان بتهزر اطلع بره، وماصدقش إن ده اسمى غير لما طلعت له الكارنيه».
«انت بقى عادل إمام أُمال فين يسرا وسعيد صالح؟ طب ما تمثلنا حتة من سلام يا صاحبى، هتقدم إيه فى رمضان الجاى؟».. جمل ومواقف ساخرة يتعرض لها «عادل» بمجرد ذكر اسمه: «فيه ناس بتفكرنى باستغل اسم الزعيم عشان أتشهر»، ورغم أن هذا التشابه كان مصادفة بحتة فإنه كان سبب السعادة لصاحبه: «بسببه كانت حاجات كتير بتتسهل عليا فى المصالح الحكومية، لأن الموظفين ساعات يقولوا هنخلص لك ورقك عشان بس اسمك على اسم الزعيم».