طالبات «القاهرة» يتحدين تهديد طلبة الإخوان: «مش هنقعد فى بيوتنا ونسيب جامعتنا للإرهاب»

قرارهم من البداية كان الخوف من النزول للجامعة هذا العام، فصل دراسى مر والذهاب كان للامتحانات فقط بينما قررت إحداهن أن الامتحانات أيضاً لا تهم «المهم أعيش»، «مريم، آية، وياسمين» ثلاث طالبات بـ«تجارة القاهرة» قررن تحدى التهديد الإخوانى أمس 19 مارس والعودة للجامعة. «ماما مكنتش عايزة تنزلنى من البيت النهارده، بس أنا قلت لها لازم أنزل، وأنا مش هخاف من النهارده»، قالتها آية محمد، طالبة كلية تجارة جامعة القاهرة وهى التى توقفت منذ بدء العام عن الذهاب للجامعة، وكان أمس فارقاً لها «كنت عارفة إنهم مش هيقدروا يعملوا حاجة وآخرهم الكلام وبس، خصوصاً إنه من أيام لما طلعنا اشتكينا للدكتور شريف مراد عميد الكلية، بأن طلاب الإخوان دخلوا علينا الجامعة بأطفال شوارع وفضلوا يشتموا فينا ويبهدلونا بالألفاظ، وعدنا إنها مش هتتكرر تانى، وخاطب الأمن وقتها، وأكد لنا إنهم مش هيدخلوا الجامعة نهائى، وأى حد يعمل شغب هيطلعوه برة الجامعة نهائى». الشابة العشرينية استطاعت أن تجمع عدداً من أصدقائها الشباب والبنات لينظموا فريقاً طلابياً فى مواجهة تجمع طلبة «الإخوان»، حال حدوث أعمال عنف «هدفنا إننا نتحدى اليوم اللى فضلوا يخوفونا منه بتهديدات العنف وحرق الجامعة، وأصرينا قدام أهلنا على إننا ننزل عشان الإخوان يعرفوا إننا مش بنخاف منهم وقادرين على مواجهتهم».