الإخوان لشبابهم: اللى يقولك «السيسى رئيسى» علمه الأدب

مندساً وسط علامات صفراء ولحى وصور مرسى، قرر «عنتر محمد» أن يكوّن شهادته الخاصة عن مسيرات الجماعة الإرهابية، ودّع أسرته الصغيرة، وخرج إلى الشارع أثناء مرور مسيرة إخوانية أسفل منزله، لا يبحث عنتر سوى عن الحقيقة، يعرّف نفسه دائماً بأنه مواطن مصرى، ليس له أى توجه سوى «حب هذا البلد»، لذا سعى أن يفهم «كيف يفكر الإخوان». «أول ما السيسى قال إنه هيترشح مابقتش خايف من حاجة، وأول ما لقيتهم ماسكين صور مرسى وكاتبين عليها: إنسى يا سيسى.. مرسى رئيسى، وبيرفعوا علامة رابعة فى وش اللى رايح واللى جاى واللى يعترضهم يضربوه، قلت أنزل أعمل نفسى منهم وأفضح كسرتهم بترشح السيسى». وسط عشرات من أنصار «المعزول» فى مسيرة بقرية الميمون بمحافظة بنى سويف، قضى الشاب الثلاثينى يوماً سماه الإخوان «يوماً من أيام رابعة». يروى عنتر: «الرجالة كانوا بيحرضوا شباب القرية إنهم ييجوا يقفوا معاهم وقالوا لهم لو سكتوا إن السيسى يبقى الرئيس مش هيبقى فيه مصر على الخريطة، والشباب صدقوهم لدرجة إنهم كل ما يشوفوا حد رافع صورة السيسى يضربوه وينتقموا منه». قرر «محمد» أن يلتقط صوراً له من داخل مسيرة الإخوان: «عشان أقنع أصحابى وكل واحد لسه بيصدق الإخوان إنى فعلاً دخلت وسطهم وشفت هما بيقولوا إيه وبيضحكوا على الشباب ازاى، عشان الناس تصحى وتحاول تساعد أى رئيس جاى إننا نحافظ على مصر من شرهم»، مضيفاً: «فى الجمعة اللى نزلتها دى حطوا الستات فى أول المسيرة وبقوا يقولوا لهم لو الأمن اتعرض لينا إوعوا تجروا».