ظلام..صمت.. إضاءة

ظلام صمت اضاءة على اليمين فيه برتكابل على الشمال دف وبوف مربوطين الاتنين بحبل فى العمق ساقية متعلق فيها طور .. والحاله العامه للديكور خاليه تماما من الترف.. فى المنتصف عيل بيصرخ جوه غربال النصيب ودقات هون القدر بترعش جوه بوئه خيط رفيع من حليب .. الواد كان اسمه غريب اتولد لا لقى بناطيل يلبسها ولا جلاليب كبر غريب وكبر معاه الدور وهنا لازم نغير فى الإضاءة والحاله العامه للديكور ظلام صمت إضاءة على اليمين تخته خشب على الشمال عيل مادد اديه للمدرس وبينضرب فى العمق سبورة مكتوب عليها اقف .. فى المنتصف كتاب غبى مكتوب عليه وزارة التربنه والتعتيم فجأة نسمع صوت جرس قديم يخرج غريب ظلام صمت اضاءة يدخل غريب على اليمين بيانو قديم وعود متعلق على الحيطه بميل ع الشمال واقف عطيل فى المنتصف جالس أوديب ويبدو على وجهه الأسف تدخل انتيجون وبيدها جثة اخيها الحبيب تقترب من غريب تعطيه سيفا خشبيا ثم تغيب يكمل غريب خطواته فيقابل لير جالس ضرير و وراه بناته يكمل غريب خطواته فيقابل شاب مجنون يصرخ فى وجهه أكون أو لا أكون يخاف غريب يجرى غريب يتعثر يسقط فى حضن قيصر يرى الدم يلطخ يداه يخاف يصرخ يسأل فيسمع صوت يجيب حتى أنت يا غريب ظلام صمت إضاءة على اليمين حيطه سد على الشمال حيطه بتتهد فى العمق عيل عوده أخضر وسط النار اتحدف فى المنتصف جمله نفسها تتكتب سانده على خط حركة كان مرسوم واتشطب ظلام.. صمت.. صمت صمت صمـــــــ