«ديب الميدان».. صاحب كشك السجاير: «مفيش مستحيل»

«أنا مش متعلم وما حِلتيش حاجة أصرف بيها على حملتى الانتخابية، بس أنا متأكد إنى لو اترشحت هكسب لأنى ببساطة صوت المهمشين اللى هم الأغلبية فى المجتمع، ده غير إنى واحد من أشهر شباب الثورة فى 25 يناير وكل الثوار عارفينى وكانوا ملقبنى باسم (ديب الميدان)» هكذا يقول إبراهيم الجمال، الذى حضر للترشح فى الانتخابات الرئاسية. عن أسباب إقدامه على هذه الخطوة يضيف «الجمال» لـ«الوطن» «أنا خارج من رابعة ابتدائى لأنى من أسرة فقيرة ومقدرتش أكمل تعليمى، وباشتغل دلوقتى صاحب كشك لكن أنا مش شايف فى ده شىء يمنعنى من الترشح للرئاسة خاصة أن فى تجارب كتيرة بتثبت أن التعليم مش هو كل حاجة وأهمها تجربة لولا دى سيلفا فى البرازيل اللى زيى خارج من رابعة ابتدائى ومع ذلك حقق لبلده ما لم يستطع دكاترة الجامعات تحقيقه». ويوضح «ديب الميدان»: «برنامجى هو برنامج ثوار 25 يناير (العيش والحرية والعدالة الاجتماعية) وضد الفساد والظلم والاستبداد وممارسات (أمن الدولة) الظالمة أيام مبارك، وعشان كده أنا عندى أمل إنى أنجح فى الانتخابات».