بريد الوطن.. بذور أموات
بذور أموات
هتطرح إيه على الخدين غير الدمعة؟!
ونور شمعة
بينطفى عند أول هُف
وروح بتخف
لكن موازينها ف الدنيا تزيد الضعف
وضهر الحلم مش قادر على الشيلة
ما غابت لمة العيلة
وحضن الفرحة يوم العيد
وآدى الدنيا بقت كرمة
وآدينا من البشر عناقيد
وإيد ورا إيد.. وكف بكف
بيخطفنا غراب الليل
ونازل ف الخلايق قطف
وآدى العشمان ف وش نهار
يقف زنهار
ونستنى طابور الحب يتقدم
ولما العمر يتهدّم
بنلقى نفسنا فجأة
وقفنا بس برة الصف
نجلاء نعيم
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي bareed.elwatan@elwatannews.com