م الآخر| هبطل انبهر خلاص.. الأفلام طلعت مسروقة

كل لما أجي اتفرج على فيلم عربي وخلاص ابقى منسجم منه ومبسوط أوي ألاقيه متعرب من فيلم أجنبي! ده مش في الأفلام بس ده انا كل ما اسمع اغنية جديدة وبرضو اتبسط بيها واتمزج الاقي اللحن (منحوت) من أغنية أجنبية ! ده ياريت توصل لكده بس لا ده كمان المغنين العرب بياخدوا الألحان من بعض. دلوقتي تسمع أغنية ماتعرفش الجملة اللحنية دي مين اللي عاملها ! بقت كل حاجة في حياتنا بنشوفها يبقى ليها كذا نسخة ! طب الموضوع ينتهي لحد كده؟ لا طبعًا عندك البرامج والمسلسلات و أفكار الكليبات .....إلخ الواحد نفسه مره هو اللي (يتنحت) بقى نفسي أسمع عن عمل فني أجنبي ويقوله ده منسوخ من فيلم مصري أو حتى عربي.. بس الموضوع ده صعب حبتين لأن الناس دي غيرنا.. الناس دي اتعلمت تفكر واتعلمت ماتعتمدش على حد غير على دماغها.. حاجة أخيرة أنا نفسي ننسخ عادي بس ننسخ طريقة ابداعهم وطريقه تفكيرهم أو إخلاصهم في شغلهم عشان (نتنحت) ولو مرة.