أحمد خليل عن توفيق عبدالحميد: أنا زعلان منه قوي.. من الممثلين الرائعين
الفنان: لما ربنا يكرم إنسان بموهبة واجب عليه يخدم مجتمعه
الفنان أحمد خليل
أثنى الفنان أحمد خليل على الفنان توفيق عبدالحميد، وذلك خلال لقائه مع الفنانة إسعاد يونس في برنامج "صاحبة السعادة" المذاع عبر فضائية "DMC".
وقال خليل: "أنا زعلان منه قوي لأن لما ربنا يكرم إنسان بموهبة المفروض إنه واجب على الإنسان ده إنه يخدم مجتمعه من خلال الهدية اللي ربنا منحها له يعني لما ربنا يديني موهبة التمثيل أو الموسيقى أو الشعر أو الغناء المفروض إن أنا أوظف هذه الموهبة لخدمة المجتمع بتاعي".
وأضاف: "توفيق عبدالحميد ممثل من الممثلين الرائعين جدا جدا جدا وربنا أكرمه بالموهبة دي اللي المفروض يخدم بيها مجتمعه"، متسائلًا: "فين توفيق عبدالحميد؟".
بينما ردت الفنانة إسعاد يونس: "سألنا نفس السؤال واستضفناه وجبناه بالعافية وكان قافل وبقاله 10 سنين مكتئب وتارك وقعد فك معايا وضحك وقال راجع وراجع إن شاء الله كويس وحتى لا يفوتني إني أقول إنه اتبرع بكل أجر الحلقة لمستشفى أبوالريش".
وأضافت: "أعتقد أنه جاله عرض بعد ما خرج بس معرفش العرض إيه لكن أنا أتمنى أن يكون صدى كلام حضرتك، بالإضافة لاستضافتنا ليه لأنه فعلا خسارة كبيرة وكل لما نكرم فنان نقوم من حديث الصبح والمساء إنه ده نوط من الأنواط اللي حصل عليها".